Алаба “Барселона” қизиқишлари доирасида

France Football нашрининг хабарига кўра, Каталония клуби Жорди Альбага рақобат туғдириш мақсадида австриялик футболчини ўз сафига жалб этмоқчи.

“Атлетико” ҳимоячиси Лукас Эрнандеснинг ёзда “Бавария”га келиб қўшилиши фонида Алабанинг Мюнхендаги келажаги ҳақида аниқ бир фикр билдириш мушкул.

26 ёшли Алабанинг амалдаги шартномаси 2021 йилнинг ёзига қадар мўлжалланган. Футболчи 2009 йилдан буён “Бавария” шарафини ҳимоя қилиб келмоқда. Ушба давр оралиғида у мюнхенликлар сафида 335 та учрашувда майдонга тушиб, 28 та гол уришга эришган. Жорий мавсумда эса Давид Германия чемпионатида 24 та учрашув (шулардан 22 тасини асосий таркибда бошлаган)да майдонга тушиб, 2 та гол урган ва 2 та голга ассистентлиқ қилган.