Акмал Ортиқов: "Шўртан"ни мағлуб этиб мухлисларимизни хурсанд қилмоқчимиз"

Сайтимиз мухбири мазкур учрашув олдидан яйпанликлар посбони Акмал Ортиқов билан интервью ташкил этди.

- Айтингчи, Акмал Ортиқовнинг футболга кириб келиши қандай юз берган?
- Футболга кириб келишим ҳақида айтадиган бўлсам, оиламизда ҳамма футболга қизиқади. Болалигимда дадам Наманган шаҳридаги футбол мактабига олиб борганлар. У ерда мен илк мураббийларим Комилжон Абдубоев ва Анвар Боқиевлардан футболнинг дастлабки сир асрорларини ўрганганман. Футболга кириб келишим шу тариқа юз берган.

- Бугунга қадар қайси жамоалар сафида ўйнагансиз?
- "Турон"га келгунимга қадар "Навбаҳор", "Андижон", "Олмалиқ" жамоалари сафида ўйнаганман.

- "Турон" жамоаси сафига қўшилишингиз қандай юз берди?
- Яйпанликлар сафига мени жамоа бош мураббийи Исломбек Исмоилов таклиф этган. Клубга келиб кўрикдан ўтдим ва шартнома имзоладик.

- Футболда дарвозабон сифатида ўйнашни ўзингиз истаганмисиз ёки мураббийлар кўрсатмаси билан шу ишга қўл урганмисиз?
- Биласизми, футболда дастлаб ҳимоячи ампуласида ҳаракат қилганман. Кейинчалик мураббийлар тавсияси, шунингдек ўз қизиқишларим туфайли дарвозабон туфайли футбол учрашуавларида дарвозабон сифати ўйнай бошладим.

- "Турон" жорий мавсумда ҳали "Шўртан"ни мағлубиятга учратолмади. 10-турда айнан "Шўртан" билан ўйнайсизлар. Сизнингча бу сафар "Турон" ғалаба қозона оладими?
- "Шўртан" ПРО-Лигада энг тартибли ўйин намойиш этадиган жамоа. Бу жамоага қарши ўйинлар ҳар доим осон бўлмаган. Худо ҳоҳласа эртанги ўйинда ғалаба қозониб, барча мухлисларимизни хурсанд қиламиз.

- ПРО-Лиганинг ҳозиргача ўтказиб келинган даври мобайнида барча жамоалар билан ўтказилган учрашувларда майдонга тушиб келмоқдасиз. Суперлига йўлланмаси бўйича қайси жамоаларнинг имкониятини юқори баҳолайсиз?
- Суперлига йўлланмаси учун кураш шахсий фикримча "Турон", "Шўртан", "Нефтчи" ва "Динамо" жамоалари ўртасида рақобат бўлади.

- "Оқ-тепа"га қарши ўйинда Асилбек Қаюмовнинг жамоангизга ғалаба голидан сўнг телевидение камераларига қараб ўз ҳиссиётларингизни намоён қилдингиз, буни барчамиз кўрдик. Шу вазиятни таърифлаб беринг.
- Биласизми, бу ўйинда 0:2 ҳисобида мағлуб бўлётганимизда барчамизда кайфият тушиб кетганди. Кейинчалик барча жамоамиз аъзолари ирода кўрсатиб якунда ғалабага эришдик. Бу вазиятни сўз билан таърифлаш қийин, шунчаки ғалаба завқи.

- Акмал Ортиқовнинг мухлисларига тилакларингиз...
- Навбатдаги тур учрашувларидан бошлаб стадионларга минг нафар мухлислар ташрифига рухсат берилди. Барча мухлисларимизга соғлик тилайман, эртага стадионга келиб бизни қўллаб-қувватлаб туришсин. Насиб бўлса эртанги ўйинда ғалаба қозониб уларни хурсанд қиламиз.

Бекзод Толибов ёзиб олди.