А Серия. Превью: Туринда йил ўйини ёхуд "Ювентус" - "Рома"

А Серия, 17-тур. Турнир жадвали

Куннинг дастлабки беллашуви "Эмполи" ҳамда "Кальяри" жамоалари ўртасидаги ўйин орқали старт олади.

Мавсум бошланганидан буён фақатгина иккита баҳсда ғалаба таъмини татиб кўрган "Эмполи" 20 очко билан 14-ўринда кетаётган "Кальяри"ни меҳмон қилади.

"Эмполи" охирги бешта учрашувдан бирортасида ғалаба нашидасини сурмаган. Бу эса "Эмполи" учун энди ҳар бир ўйин финал каби ўта муҳим ва ҳал қилувчи аҳамиятга эга бўлади. "Кальяри"да эса вазият сал бошқачароқ. Жамоа ўтказилган сўнгги бешта ўйиндан атига биттасида ғалаба қозонган. Ғалабасиз серия эса учта ўйиндан буён давом этиб келмоқда. "Стадио Карло Кастеллани"да кечадиган баҳсда кўп нарса жамоаларнинг руҳий ҳолатига боғлиқ бўлади. Турнир жадвалидан келиб чиқсак, ғалаба майдон эгалари учун ўта муҳим. "Кальяри"нинг ишлари "Эмполи" билан таққослаганда у қадар ваҳимали эмас. Лекин "Кальяри" меҳмонда шунчаки очколарни рақибига бериб қўйиш учун сафарга отланмаган. Бу ўйинда катта эҳтимол билан дуранг қайд этилиши ҳам мумкин. 

Ўзаро ўйинлардаги факт:
Бу жамоалар жами 10 марта ўзаро ўйнашган. "Эмполи" ва "Кальяри" ҳислбида бир хил 4тадан ғалаба ва қолган иккита учрашувда дуранг қайд этилган.

"Эмполи" - "Кальяри" (19:00)
"Стадио Карло Кастеллани" стадиони.
Бош ҳакам: Никола Риццоли.


Куннинг иккинчи ўйини Миланда маҳаллий "Милан" ҳамда "Аталанта" жамоалари ўртасида бўлиб ўтади. Монтелла шогирдлари турнир жадвалида пешқадам "Ювентус"дан 7 очкога, иккинчи поғонадаги "Рома"дан эса 3 очкога ортда қолишмоқда. "Милан"ни шунингдек "Наполли" ҳамда "Лацио" жамоалари таъқиб этишмоқда. Улар ўртасидаги фарқ атига бир очкони ташкил қилади.

"Милан"нинг ушбу турдаги рақиби "АТаланта" ҳисобида эса 28 очко мавжуд ва улар "Милан"дан 4 очкога орқада қолишмоқда. Бугунги ўйинда "Аталанта" орадаги фарқни биттага қисқартириши, "Милан" эса 7тага ошириш имкониятига эга. Ўтган мавсумда "Милан" "Аталанта" қаршилигини иккита учрашувда ҳам енга олмаган. "Сан Сиро"да ўтган ўйин дуранг билан якунланган бўлса, "Аталанта" ўз уйида "Милан"ни 2:1 ҳисобида мағлубиятга учратганди. "Милан" жамоаси ва мухлислари ўтган йилги натижаларни унутишмаган ва улар бугун ўша учрашувлар учун "Аталанта"дан ўч олишга уриниб кўришлари шубҳасиз.

Тан олиш керак, Винченцо Монтелла "Милан" ўйинини яхши тарафга ўзгартира олди. Жамоа ўйинида мазмун пайдо бўлди. Аммо ҳали футболчилар тўлиқ Монтелланинг фалсафасини тушуниб етишгани йўқ. Бунинг учун эса вақт талаб этилади.

"Аталанта"да эса Жан Пьеро Гасперини жуда яхши иш олиб бормоқда. Жамоа бу йили барқарор ўйин кўрсатмоқда. Турнир жадвалида ҳам имкон қадар юқори қисмида ушланиб турибди ва кўплаб жамоаларга бош оғриғи туғдирмоқда. Фақатгина охирги ўтказилган иккита беллашувда "Аталанта" муваффақиятсиз ўйин ўтказди. Дастлаб "Ювентус"га мағлуб бўлган бўлса, кейинчалик ўз уйида "Удинезе" томонидан доғда қолдирилди.
Гасперини жамоани мунтазам равишда 3-4-1-2 тактик схемасида ўйнатиб келмоқда.

Монтелла эса 4-3-3 схемаси мурожаат этмоқда.

Иккала жамоанинг фалсафаси ва ўйин услуби ҳужумкорликка йўналтирилган. Шу боисдан бугунги баҳс ҳам турнир жадвалидан келиб чиққан ҳолда ва жамоаларнинг ҳужумкорликка урғу беришларини инобатга оладиган бўлсак, учрашув томошабоп ўтади ва мухлисларни асло зериктириб қўймайди. Иккала жамоа ҳам ўз мухлисларига исботлайдиган нарсалари мавжуд. "Аталанта" кетма-кет икки бор 3:1 ҳисобида мағлубияга учраган бўлса, "Милан" ўтган турда асосий рақибларидан бири "Рома"га имкониятни бой берганди. Айнан мана шу жиҳатлар ҳам жамоаларни ўйин олдидан жаҳлдор қилади ва ўртага ташланган 3 очко учун аёвсиз жанг бўлишини билдиради.

Ўзаро ўйинлардаги факт:
"Милан" ва "Аталанта" жамоалари жами 112 бор ўзаро куч синашишган. "Милан" ҳисобида 52та ғалаба, "Аталанта"да эса 22та ютуқ бор. Жамоаларнинг 38та ўйинида дуранг қайд этилган.

"Милан" - "Аталанта" (22:00)
"Сан Сиро" стадиони.
Бош ҳакам: Давиде Масса.

Энди нафақат куннинг ёки турнинг, балки йилнинг энг муҳим ўйини, яъни "Ювентус" ҳамда "Рома" қарама-қаршилиги ҳақида тўхталиб ўтамиз.
Тунда бошланадиган ушбу беллашувга ортиқча таърифга ҳожат йўқ. Ҳозирги кунда Италия чемпионатининг пешқадамлари, чемпионлик учун курашаётган асосий рақобатчилар ўртасидаги учрашув чемпионатнинг 17-турини безаб бериши аниқ.

Бу ўйин аввало чемпионлик учрашуви сифатида эътироф этилмоқда. Шунингдек, "Рома" ва "Ювентус"нинг охирги йиллардаги қарама-қаршлиги, принципиаль аҳамият касб этиши ҳеч кимга сир эмас. Янги мавсум олдидан "Рома"нинг етакчи аъзоси Миралем Пьяничнинг Римдан Туринга кўчиб ўтиши катта шов-шувга сабаб бўлди.

Пьяничнинг собиқ жамоасига қарши илк ўйини ва уни римликлар қай тарзда қабул қилишлари алоҳида мавзу.

"Рома" муҳим ўйин олдидан йўқотишларга эга. Тотти "Ювентус"га қарши баҳсда майдонга туша олмайди. Муҳаммад Салоҳ эса сафга қайтиши кутилмоқда. "Ювентус" асосий қуроли Пауло Дибала эса жароҳатидан фориғ бўлиб сафга қайтган ва спорт формасини тиклаб олмоқда.

Лучано Спалетти "Рома"ни кўпроқ 4-2-3-1 тактик схемасида ўйнатмоқда. Баъзан эса 5-3-2 схемасига ҳам мурожаат этади. Масалан Рим дербисида Спалетти айнан 5та ҳимоячи билан ўйнаганди. "Милан"га қарши эса 4-2-3-1 тактик схемасидан фойдаланди.

Аллегри эса ҳам икки хил схемадан фойдаланади. Асосан эса 3-5-2 схемасини ишлатса, пайти келганда 4-4-2 ва 4-3-3 схемасига ҳам ўтиши мумкин.

"Ювентус" бугун ғалаба қозонгудек бўлса, унда чемпионлик пойгасида анча илгарилаб кетади ва "Рома"ни 7 очкога ортда қолдириши мумкин. "Рома" ғалабага эришса, унда орадаги фарқ 1 очко бўлади ва интрига янада кучаяди.

"Ювентус" - "Рома" ўйинида мухлислар Гонсало Игуаин ва Эдин Жеко тўқнашуви гувоҳига айланишади. Италия А Сериясининг ҳозирги кундаги энг яхши ҳужумчиси ким деган саволга ҳам ушбу ўйин орқали ҳамма ўзига керак бўлган жавобни олиши мумкин.

Ҳозирча Гонсало Игуаин 16 ўйинда 9та гол урди. Игуаин ўтказган 16 учрашувидан 11 тасида асосий таркибдан ўрин олди. Қолган беллашувларда эса захирадан майдонга тушганди.
Эдин Жеко эса айни пайтда А Сериянинг тўпурари саналади. Жеко ҳисобида 12та гол мавжуд. Жеко ҳам Игуаин сингари 16та учрашувда майдонга тушган. Эдин 16та ўйиннинг 14тасини бошланғич таркибда бошлаган.

Ўзаро ўйинлардаги факт:

"Ювентус" ҳамда "Рома" жамоалари шу кунга қадар барча мусобақаларда жами 166 маротаба тўқнаш келишган. Шуларнинг 79тасида "Юве" ғалаба қозонган. "Рома" 38 бор ғалабани ўзиники қилиб олган. Қолган 49та ўйин эса дуранг натижаси билан тугаган.

"Ювентус" - "Рома" (00:45)
"Ювентус стэдиум" стадиони.
Бош ҳакам: Даниэле Орсато.

Италия А серияси. Турнир жадвали

Сайтимизнинг Instagram даги саҳифаси - instagram.com/championat.asia