Захирасиз қолиб кетган жамоалар ёхуд “Футбол-МЕД”нинг таъсири

Айниқса давралар оралиғида кўплаб футболчилар Чиғатойдаги “Футбол-МЕД” кўригидан муваффақиятли ўта олмади. Уларнинг орасида хорижлик футболчилар ҳам етарлича топилади. Девид Ония, Эбах Тобэи ҳамда Вячеслав Шевченко каби узоқ хориждан ташриф буюрган футболчилар айнан тиббий кўрикдан ўта олмай, чемпионатимизда ўйнаш имкониятидан маҳрум бўлди. Билишимизча, ҳозирги кунда ҳам олий лиганинг аксарият жамоаларида айнан тиббий кўрик билан боғлиқ муаммолар йўқ эмас.

Куни-кеча старт олган биринчи лиганинг иккинчи давра ўйинларини кузатар эканмиз. Ушбу лигадаги жамаоларда ҳам шу каби холат юз берган. Яъни биринчи лига жамоалари ҳам “Футбол-МЕД” кўригидан ўтишган. Айрим жамоаларнинг бир қатор ўйинчилари ундан муваффақиятли ўта олмай, қайта даволанишга жўнатилган.

Хусусан Нукуснинг “Орол” жамоаси 1-турда Қўқонга сафар уюштирди. Неъматулла Қутибоев жамоаси шу куни ўйинни битта дарвозабон билан ўтказди. Захира посбони йўқ. Агарда Худо кўрсатмасин, асосий голкипер Улуғбек Янгибоев жароҳат олгудек бўлса, хўш у холда дарвозани ким қўриқлайди? Нукусликларнинг нима учун водийга битта дарвозабон билан келганини ҳозирча аниқлаб етмадик.

Биринчи лигада аранг иштирок этиб келаётган Самарқанднинг “Шердор” жамоаси ҳам Андижонга иккита захира ўйинчиси билан келган. Бу жамоанинг “УзДонгЖу”га қарши кечган баҳсини бевосита стадионда кузатдик. “Шердор”нинг айрим либосларидаги рақамлар ўчиб кетган. Учрашув ҳаками буни беэътибор қолдирган кўринади. 10-рақамда ҳаракат қилган Шохруҳ Исломовнинг либосидаги 1 рақам ўчиб кетиб, фақат 0 рақам кўриниб турарди. Учрашувдан сўнг жамоа бош мураббийини суҳбатга тортиб, муаммолар ҳақида сўрамоқчи бўлдик. Бироқ йирик ҳисобдаги мағлубият сабабми, билмадигу, Сайфулло Шарипов интервьюни беришни истамади.   

Биринчи лиганинг яна бир вакили “Истиқлол” эса ўз майдонида “Шўртан”ни қабул қилди. Қизиғи ушбу жамоа ҳам ўйинни битта захира ўйинчиси билан ўтказган. Яъни захирада биргина дарвозабон Убайдулло Иноятуллаев билан ўтказди. Олган маълумотларимизга кўра, “Истиқлол”нинг битти захира ўйинчиси билан қолиб кетишига айнан “Футбол-МЕД” сабаб. Чунки Камол Жўнашев бошқарувидаги жамоадан қарийб 8 нафар ўйинчи тиббий кўрикдан ўта олмаган. Катта эхтимол билан бу жамоа эртага “Машъал-2”га қарши кечадиган баҳсни ҳам битти захира ўйинчиси билан ўтказадиган бўлиб турибди.

Норасмий маълумотларга кўра, Тошкентнинг яна бир жамоаси “Обод”дан ҳам 12 нафар футболчи тиббий кўрикдан ўта олмаган. Лекин бу жамоанинг шанба куни “Хоразм”га қарши кечган баҳсида захира ўриндиғи узун эди.

Ушбу ҳолат бўйича билганларимиз ҳозирча шулар. Суриштирувларимизни давом эттирган холда, бу ҳақда кейинроқ сизларга яна етказамиз.