Кингсли Сарфо 1995 йил 13 февралда Ганада таваллуд топган. Онаси футбол билан шуғуллангани сабабли қизлар жамоасида дастлабки сабоқни олган Кингсли шаклланишни "Энокье Старс"да давом эттирган.

Ойим футболчи бўлган. У Гана аёллар терма жамоасида ўйнаган ва баъзи клубларда тўп тепган. Шу боис футболга қизиқишимга ойим сабабчи бўлган. Унинг собиқ клуби "Эштаун Лэдиес" деб аталарди. Футболдаги илк қадамларимни қизлар билан қизлар жамоасида бошлаганман. У пайтда жудаям ёш эдим. Кейинчалик ўғил болалар жамоаси – "Энокье Старс"га ўтдим. Сўнгра Швециядан Ганага скаутлар келди ва мени танлаб олишди. "Coast Team"дан Акосомбодаги "Golden Boot" академиясига ўтказишди. У ердан эса йўлим Швецияга тушди ва профессионал фаолиятимни бошладим.

Скаутлар Ганага келган пайт ёшим талабга тўғри келмасди. Ўша пайтда 14-15 ёшларда кичик жуссали бола эдим. Улар эса 18 ёшлиларни излашган. Тасодифан ўзимдан катталар билан ўйнаётганимни кўриб қолишди ва мени танлашди. Ганада улар билан яшадим, машғулот ўтказдим ва 18 га тўлишим арафасида Швецияга олиб кетишди.

Шу тариқа, 18 ёшида профессионал футболчига айланган Сарфо "Розенгард", "BW 90", "Сириус" ва "Мальмё" клубларида тўп тепди.

"Сириус"даги ёрқин мавсумдан сўнг, Сарфога амалдаги чемпион – "Мальмё" томонидан таклиф тушди. "Сириус" 1,5 миллион евро талаб қилаётганига қарамай, футболчи клуб билан шахсий шартнома шартларини келишиб олди. Сарфонинг агенти таъкидлашича, унинг мижози фақат "Мальмё"га ўтишни хоҳлаган. Сабаби, у Швеция фуқаролигини олиши учун яна бир йил керак эди, шу боис у хорижга кетишни истамади, бундан ташқари, Чемпионлар лигасида ўйнашни мақсад қилганди.

Швецияга борганимда, муҳит сабабли мослашиш жуда қийин бўлган. Биласизми, у ер жуда совуқ. Маданият бошқача. Шунинг учун бошида осон кечмади. Кейинчалик кўникиб кетдим ва ҳаммаси нормал ҳолатга айланди.

2017 йил 30 сентябрда Сарфони бир ҳолатда зўрлашга уриниш ва икки ҳолатда вояга етмаган шахс номусига тегиш айблови билан ҳибсга олиш талаб қилинди. Ҳибсга олиниши натижасида Сарфо "Мальмё" ўйинларидан четлатилди, бироқ 2018 йил 11 январда суд жараёни якунланишини кутиш мақсадида бу тақиқ вақтинча олиб ташланди.

2018 йил 31 январда эса Сарфо беш ҳолатда вояга етмаганларни зўрлашда гумонланиб, Швеция полицияси томонидан қайта ҳибсга олинди. 2018 йил 8 июнда у икки йил-у саккиз ой муддатга озодликдан маҳрум этилди. Бундан ташқари, унга 150 000 швед кронаси миқдорида жарима солинди ва қамоқ жазосини ўтаб бўлгач, мамлакатдан депортация қилиниши белгиланди. Сарфо камроқ – 1 йил-у 10 ой қамоқда ўтирди.

Осон бўлмади. Жуда қийин эди. Полиция бўлимида эдим, жиноятчи эмасман деб ўйлардим. Мен фақат футболчи эдим. Қамоқхонада ҳам машғулот ўтказдим. Ўзимга сўз бердим: барибир қайтаман. Қамоқхона соқчилари ҳайрон қолишарди, улар ишимни кузатиб боришган экан. Уларнинг ўзлари ҳам айбдор эмаслигимни билишарди. "Бу шунчаки сиёсат, сенинг ишинг сиёсий иш бўлиб кетди," дейишарди улар.

Тушкунликка тушдим. Футболчи учун бу ўлим билан баробар. Қамоқда шароит ёмон эмасди, телевизор бор эди, овқат беришарди, лекин эркинлик йўқ эди.

Шунингдек, 2017 йил давомида Сарфо Швецияда бир неча бор амалдаги ҳайдовчилик гувоҳномасисиз автомобиль бошқарган. Швеция қонунчилигига кўра, бунинг учун олти ойгача озодликдан маҳрум этиш жазоси қўлланилиши мумкин. Аммо Сарфо клуб томонидан ҳеч қандай интизомий жазога тортилмади.

"Олимпиакос Никосия" спорт директори унга иккинчи имконият берганидан сўнг, Сарфо икки йиллик танаффусдан кейин футболга қайтди. У клубдаги биринчи мавсумидаёқ порлаб, жамоани кучли олтиликка ва 30 йилдан сўнг илк бор кубок финалига олиб чиқди. Унинг шартномаси яхшиланган ҳолда 2023 йилгача узайтирилди ва клуб сардори этиб тайинланди.

Уйда эдим, агентим қўнғироқ қилди. Аслида Саудия Арабистонидан вариантлар бор эди ва деярли йўлга чиққандим. У менга қўнғироқ қилиб, Кипрда эканлигини, у ер жуда яхши жойлигини, одамлари ажойиблигини ва бир клуб борлигини айтди... бу "Олимпиакос" эди. У келишимни жуда хоҳлади. "Майли, имкониятдан фойдаланиб кўраман", дедим, чунки Кипр ҳақида эшитгандим, лекин бормагандим. Янги саргузашт хоҳладим. Шундай бўлдики, тунда қароримни ўзгартирдим, чунки аслида Араб давлатига кетаётгандим.

2022 йил январь ойида Сарфо АПОЭЛ сафига ижара асосида қўшилди. 26 июнда эса у клуб билан уч йиллик шартнома имзолаб, жамоанинг тўлақонли аъзосига айланди. 

Агентим билан келажагим учун нима яхшироқ эканлигини, олға босиладиган йўлни ва бу келгусида бизга нималар бериши мумкинлигини муҳокама қилдик. "АПОЭЛ" энг яхши ечим деган хулосага келдик. 

2025 йилнинг июнь ойида Сарфо шартнома муддати якунлангани сабабли клубни тарк этиб, эркин агент мақомини олди.

Сарфо 2017 йилда Гана терма жамоаси сафида Угандага қарши учрашувда дебют қилди.

Севимли клубим – "Челси". Лекин болалигимда ҳамиша "Барселона"да ўйнашни орзу қилганман. Кумирим Эден Азар эди. Кейингиси – Месси. Шунингдек, Иньестанинг ўйин услубини яхши кўраман.

Футболчи бўлмаганимда, эҳтимол, мусиқачи бўлардим. Майдондаги ғояларимни ёшларга сингдиришни хоҳлайман. Балки мураббий ёки скаут бўлишни истарман. Чунки менда шундай "кўз" бор, агентим учун баъзи ўйинчиларни таҳлил қилганман (топиб берганман) ва улар бу соҳада энг яхшилардан бирига айланишган. Швецияда бир профессионал мураббий бор, агар у бирор ўйинчи хоҳласа, ўша ўйинчи ҳақида фикримни сўрайди.

Кингсли Ганада болаларга ёрдам берадиган хайрия фондини қўллаб-қувватлайди.

Ишни кенгайтириб, улкан лойиҳага айлантирмоқчиман. Шу боис, "Кингсли Сарфо фонди"ни ташкил қиляпман. Бу фонд фақат болалар учун эмас. Умумий маънода. Яъни, баъзи нарсаларга қурби етмайдиган одамлар учун. Касал бўлганда шифохона тўловларини тўлай олмайдиган одамлар ва шунга ўхшаш ҳолатлар учун. Демак, бу фақат футболга алоқадор эмас. Жараён кўп нарсани қамраб олади. Инсонларга қандай ёрдам керак бўлса, қўллаб-қувватлашга тайёрман.

Дарвозабон позициясидан ташқари исталган жойда ўйнай оламан. Ҳар қандай позицияга мослаша оламан. Балки 9-рақамли ўйинчи бўлиш ҳам бироз қийиндир. Аслида "эркин ижодкор"ман. Швецияда шундай ҳаракат қилардим. Қисқаси, қаерга қўйсангиз ҳам, менга бир неча ҳафта керак бўлади ва ўша позицияни эплаб кетаман.

Ошпаз ва официантликдан футболга. Боаке ҳақида 7 қизиқарли факт

Баскетбол терма жамоасига чақирилган, балиқли майдонда тўп тепган ҳамда Жек Читтак мухлиси бўлган "Бухоро"нинг янги легионери билан танишамиз

Юзи қонга беланган ва агентидан нолиган "Динамо"нинг уругвайлик футболчиси билан танишамиз

"Локомотив" легионерининг ҳаётий ҳикояси

Отасига эмас, Роналдиньога ўхшашни хоҳлайдиган, гол нишонлагани учун жамоадан ҳайдалган "Бухоро"нинг икки ниқобли легионери билан танишамиз

Оқил Абдубарноев тайёрлади.