Лёвдан рад жавобини олган Ўзбекистон УЕФА кубогини қўлга киритган мураббийга таклиф билан чиқди

Championat.asia сайтининг хорижий манбаларга таяниб хабар беришича, ЎФА терма жамоага Фотиҳ Теримни бош мураббий қилиб тайинламоқчи. 71 ёшли мутахассис Марказий Осиё мамлакатидан келган таклифни кўриб чиқиш учун вақт сўраган.

2008 ва 2016 йилги Европа чемпионатларида Туркия терма жамоасида ишлаган, "Галатасарой" билан УЕФА кубогини қўлга киритган, Италияда "Фиорентина" ва "Милан," Грецияда "Панатинаикос" каби жамоаларни бошқарган 71 ёшли мураббий шу пайтгача ҳеч қачон жаҳон чемпионатида иштирок этмаган.

Теримнинг таклифни қабул қилиш-қилмаслиги яқин вақт ичида аниқ бўлади. Ҳозирча ҳеч қандай рақам ёки муддат ҳақида гап йўқ. Агар у рози бўлса, дарҳол ишга киришади.

Эслатиб ўтамиз, Фотиҳ Теримнинг сўнгги иш жойи Саудия Арабистонининг "Ал Шабаб" клуби ҳисобланиб, мутахассис у ерда ярим йил ишлади.