Ёзда клубдан кетиши аниқ, аммо манзили ноаниқ бўлган 8 юлдуз

1. Матейс де Лигт ("Аякс")

Transfermarkt бўйича нархи - 70 млн. евро

"Аякс"нинг марказий ҳимоячиси 19 ёшида халқаро даражада етарли тажрибага эга бўлди. Терма жамоада гол уряпти, Чемпионлар ярим финалида ўйнади ва "Аякс" сардорига айланди. Клуб раҳбарияти Матейс яна бир йил қолмаслигини яхши билади.  "У жамоада қолишини истардик, аммо бунинг иложи йўқлигини тушуниб турибмиз. У Англия ёки Испания клубига ўтса керак" - дейди Эдвин ван дер Сар. Бу эса Эрик тен Хагнинг сўзлари: "Де Лигтни ушлаб қололмаймиз. Жуда кўп жамоалар уни ўз таркибида кўрмоқчи. У қаерга ўтишини билмайман". Ҳимоячининг ўзи ҳам буни билмаса керак. Аммо клубдагилар унинг кетишини жуда яхши билиб туришибди.

2. Николья Пепе ("Лилль")

Transfermarkt бўйича нархи - 65 млн. евро

Ивуарлик вингер Франция лигасида ёрқин ўйин кўрсатганидан "Лилль" президенти апрелдаёқ унинг кетиши "ҳал қилинган масала" деб айтди. Энди футболчи ва клуб муносиб таклифни танлашлари керак. БУ қийин: Пепе учун катта навбат пайдо бўлди. Баҳорда "Интер" 60 млн. евро таклиф қилган бўлса, ҳозир МЮ, ПСЖ ва "Бавария" ҳам унга қизиқиш билдирмоқда, "Ливерпуль" эса 80 млн. евро тўлашга тайёрлигини билдирди. Пепе бу нархга арзийди: "гол+пас" тизими бўйича 35та учрашувда 34 балл.

3. Хуан Мата ("Манчестер Юнайтед")

Transfermarkt бўйича нархи - 25 млн. евро

Май бошида МЮ раҳбарияти Хуанга янги шартнома таклиф қилди, аммо испаниялик клуб таклифини яна бир бор рад этди. У июнь охирида эркин агентга айланади. Ҳозирча у келаси мавсум қаерда ўйнашини билмайди. Январда "Барселона" билан музокаралар ҳақида хабарлар пайдо бўлган эди, аммо томонлар ҳозиргача келиша олишмади. Мата клуб топишга қийналмаслиги аниқ: 31 ёшли футболчи Европанинг ҳар қандай жамоасини кучайтиришга қодир, унинг маош бўйича талаби эса ҳозирги ўлчовлар бўйича катта эмас.

4. Гарет Бэйл ("Реал")

Transfermarkt бўйича нархи - 70 млн. евро

Зинедин Зидан Гарет Бэйлга ишонч билдирмаётганини очиқ-ойдин кўрсатди. Чемпионат охирида у жароҳатсиз бўлиб турган уэльсликни хатто қайдномага ҳам киритмади. Мураббийнинг сўзларидан ҳамма нарсани тушуниб олиш мумкин. "Мен бошқаларга ишонч билдиряпман. Шунча ютилган совринлардан кейин қарор қабул қилишим керак, хатто уни қабул қилиш қийин бўлса ҳам" - Зидан Гаретнинг Мадриддаги келажаги борасида берилган саволга шундай жавоб қайтарди. Шунга қарамай, Бэйлнинг агенти мижози учун янги жамоа қидиришга шошилмаяпти, унинг ўйлашича, мураббийнинг фикри ўзгариб қолиши мумкин.

5. Кейлор Навас ("Реал")

Transfermarkt бўйича нархи - 12 млн. евро

Мадриднинг AS газетаси майда қуйидаги хабарни эълон қилди: Уч карра Чемпионлар лигаси ғолиби Кейлор Навас жамоанинг келаси мавсум режаларига киритилмаган. Ҳозир "Реал" ва агент унга янги клуб изламоқда. Тахминий вариантлардан бири - ПСЖ. Клуб Навас ва Давид де Хеа бўйича иккита жамоага мурожаат қилган. Агар испаниялик Парижга кўчиб ўтса, МЮ Давид ўрнига Кейлорни олиб келади. Бу ҳолатда Навас Погба трансферининг бир қисмига айланиши мумкин.

6. Адриен Рабьо (ПСЖ)

Transfermarkt бўйича нархи - 35 млн. евро

ПСЖ тарбияланувчиси клуб билан янги шартнома имзолаб, узоқ вақт жамоада қолиши ва клуб афсонасига айланиши мумкин эди. Аммо бунинг ўрнига у "Барселона"га ўтишни истади. Унинг онаси (агенти) эса 10 млн. евро бонус олишни хоҳлади. ПСЖ эса янги битимга имзо чекишни истамаган футболчини жиддий жазолади: Рабьо ўйин амалиётисиз қолди ва 2018 йилнинг декабридан сўнг майдонга тушмади. Унинг нархи 50 млн. евродан 35 млн. еврога тушди. ПСЖ билан шартнома 30 июнда якунига етади, аммо муаммо шундаки - "Барселона" Френки де Йонгни сотиб олди ва ҳозир де Лигт ва Гризманни харид қилишга умид қилмоқда. Умуман олганда марказий ярим ҳимоячи муаммоси ҳал бўлган.

Футболчи агентини алмаштирди ва ҳали ҳам "Барселона"га ўтмоқчи. Унга "Тоттенхэм" томонидан қизиқиш бор, бироқ Рабьо "шпорлар" таклифини қабул қилса, маоши сезиларли даражада камайишига рози бўлиши керак.

7. Мауро Икарди ("Интер")

Transfermarkt бўйича нархи - 80 млн. евро

Бир йил олдин аргентиналикнинг "совчилари" жуда кўп эди, "Интер" эса у билан янги шартнома имзолаб, товон пулини ошириб олишни режа қилганди. 110 млн. евро Италия клуби учун камлик қилди. Бир мавсум ўтди ва энди вазият умуман бошқача: Энди "Интер" аргентиналикни сотиб юбормоқчи, аммо ҳеч ким хатто 80 млн. евро ҳам таклиф қилмаяпти. Икарди жамоадошлари, Спаллетти, раҳбарият ва мухлислар билан жанжаллашиб қолди. У жамоада қолишини тасаввур қилиш қийин. Бунинг устига янги бош мураббий Антонио Конте уни клубда кўрмоқчи эмаслиги ҳақида хабарлар пайдо бўлди.

Клуб Икардини алмаштириш ҳақида ўйлаб турибди: "Интер" МЮга Ромелу Лукаку учун аргентиналикни таклиф қилмоқда, агар бу вариант ўхшамаса "Ювентус" билан Аргентина вакиллари (Дибала-Икарди) "бартерини" амалга оширишга уриниб кўради. Ҳозирча ҳеч бир клуб таклифга рози бўлгани йўқ.

8. Антуан Гризманн ("Атлетико")

Transfermarkt бўйича нархи - 150 млн. евро

Гризманн мавсум охирида "Атлетико" ишқибозлари билан хайрлашди. Кейин клуб президенти Энрико Сересо футболчининг кетиш қароридан ҳафсаласи пир бўлганини айтди. У тез орада "Барселона"га ўтадигандек туйилганди. Аммо ҳаммаёқ жим-жит. Антуандан келаси мавсумни қаерда бошлаши ҳақида сўралганда, у қуйидагича жавоб берди: "Яхши савол. Билмайман".

Нималар бўлаяпти? "Барселона" футболчилари унинг трансферидан мамнун эмасга ўхшайди. Лионель Месси бу маълумотни клуб раҳбариятига етказиб қўйди. Бироқ бош мураббийи Эрнесто Вальверда эса уни жамоада кўрмоқчи. Гризманнинг ўзида учта таклиф бор - "Барселона". "Манчестер Юнайтед" ва "Бавария". Вазият жуда чигал.