Хожимат Эркинов: "Локомотив"га 3та гол ураман, деб ўйламаган эдим. Лекин..."

Суперлиганинг 25-турида "Локомотив" меҳмони бўлган "Пахтакор" йирик 3:0 ҳисобида ғалабани ўзиники қилди. Ўйиндаги барча учта гол илк дақиқалардан бошлаб ҳаракат қилган Хожимат Эркинов ҳисобига ёзилди. Олдинда жамоани "Бунёдкор" билан Ўзбекистон кубоги ярим финалида кечадиган яна бир Тошкент дербиси кутиб турибди. Ушбу баҳс олдидан Хожимат Эркиновнинг фикрлари билан қизиқдик. 

- Тошкент дербисида жамоани нима бунчалик олдинга силжишга ва ғалаба сари руҳлантирди? Чунки жамоа аллақачон чемпионликни расмийлаштириб бўлган, қолган баҳсларни эса босимсиз, бемалол ўтказиши табиий ҳол эди...

- Биласиз, "Пахтакор"нинг "Локомотив", "Бунёдкор"га қарши ўтказган ўйинлари олдиндан қийин бўлиб келган. Ҳар қандай ҳолатда ҳам дерби муҳимлилигини йўқотмаган. Бунда Ўзбекистоннинг энг кучли жамоалари тўқнаш келади. Шу нарса бизга мотивация берди, деб ўйлайман. 

- "Локомотив" дарвозасига 3та гол уришни ўйлаганмидингиз? 

- Буни ўйламгандим. Лекин, иккинчи голни урганимдан сўнг дублни хет-трикка айлантириш истаги туғилди. Худога шукур насиб қилганидан хурсандман. 

- Олдинда жамоани "Бунёдкор"га қарши иккита ўйин кутиб турибди? Сизнингча қайси бири қийин ўтади, кубок ёки Суперлига?

- Ўзбекистон кубоги қийин ўтади. Чунки финал йўлланмаси битта ўйинда ҳал бўлади. Муҳимлилик даражасини олиб қараганда ҳам кубок баҳси устунроқ. Мақсадимиз мазкур мусобақада ҳам ғолиб чиқиб учинчи совринни қўлга киритиш.  

- Бу йилги мавсумдаги ҳаракатларингиздан кўнглингиз тўляптими? Жароҳатлар қанчалик ўз имкониятларингизни юз фоиз кўрсатишга тўсқинлик қилди?

- Қисман тўляпти. Орада жароҳатларни ҳисобга олмаганда мавсум яхши ўтяпти. Бу билан тўхтаб қолиш фақат зарар келтиради. Меҳнат қилиш, олдинга интилишда давом этаман. 

Абдулазиз Искандаров ёзиб олди