"Водий футболи": "Навбаҳор" ва "Қўқон-1912" ғалаба қозонди

"Навбаҳор": Кетма-кет учинчи ғалаба

28-турда Бахтиёр Ашурматов шогирдлари ўз майдонида "Қизилқум"ни қабул қилди. Учрашувда наманган клуби 2:1 ҳисобида зафар қучди. Шундай қилиб, "лочинлар"нинг ғалабали серияси учта ўйинга етди. Бундан олдин жамоа "Қўқон-1912" ва "Бухоро" таслим қилинганди.

Кейинги турни "Навбаҳор" Ғузорда "Шўртан" меҳмони бўлади.


"Қўқон-1912": "Нефтчи" илк бор мағлуб этилди

Олий лиганинг 28-турида "Нефтчи" меҳмони бўлган "Қўқон-1912" 1:0 ҳисобида зафар қучди. Шу тариқа, "Қўқон-1912" ўз тарихида илк бор олий лигада "Нефтчи"ни мағлуб этишга эришди. Бугунга қадар “Нефтчи” ва “Қўқон-1912” олий лигада 19 бора тўқнаш келишганди. “Нефтчи” 17та ўйинда ғолиб бўлган, 2 марта дуранг қайд этилганди. “Қўқон-1912” бу рақибни умуман мағлуб эта олмаганди.

"Қўқон-1912" 29-турни "Сўғдиёна"га қарши ўз майдонида ўтказади.


"Андижон": "Бунёдкор"ни умуман мағлуб эта олмаганмиз

Бу икки клуб ўзаро 15 бор куч синашишган. Натижалар “Бунёдкор”нинг катта устунлигини кўрсатмоқда. “Қалдирғочлар” 12та ўйинда ғолиблик нашидасини суришган. 3та ўйин дуранг билан якунланган. “Андижон” ўз тарихида бу рақибни умуман енга олмаган.

“Бунёдкор” Тошкентда ўтган ўйинларда 6 марта ғалабага эришган. “Бургутлар” бу рақиб майдонидан фақат бир бор (2012 йил) дуранг билан қайтган. “Андижон” сафарда “Бунёдкор” дарвозасига битта гол урган.