Владимир Бубанья: "Андижон" мухлислари Осиёда энг зўрлари. Мухлислар олдида қарздормиз"

- Владимир бугунги учрашув ҳақидаги фикрларингиз билан бўлишсангиз? Бугун жамоа ғалаба қозонишига нима етишмади?

- "Металлург" муносиб рақиб эканлигини билар эдик. Бекободликлар жорий мавсумда ғалаба қозонмаганлигига қарамай, улар яхши шакилланган жамоа деб ўйлайман. Бугун бизга қарши ҳаракат қилишди. Ўтказиб юборган голимизда хато қилдик дея олмайман. Рақибнинг омади келди ва гол урди. Ўйинга қайта олдик ва ҳисобни тенглаштирдик. Дуранг бугунги учрашувнинг адолатли якуни бўлди. Бугун бир очкони қўлга киритдик ва бу ёмон натижа деб ўйламайман. Кейинги учрашувларда ғалаба қозонишимиз керак.

- "Андижон" мавсумни кўтаринки руҳда ўтказмоқда. Лекин сўнги уч баҳсда "Андижон" кўп очко йўқотди. "Сўғдиёна"дан кутилмаганда мағлубият, "Нефтчи" билан эса ғалаба қўлдан чиқарилди ва бугунги тўқнашувда "Андижон" кўпроқ нарсага қодир эди. Жамоанинг сўнги учрашувларидаги натижасига изоҳ бериб ўтсангиз?

- Ҳа, сўнги учрашувларда омадимиз келмаяпти. Бироқ бунга бир нечта сабаблар бор. "Нефтчи"га қарши кечган учрашувда ғалабани қўлдан чиқардик ва бунга ўзимиз айбдормиз. Ўйин сўнги ҳимояга ётиб олдик ва рақиб бизни жазолади. Ҳужум қилишда давом этишимиз керак эди. Кўпроқ меҳнат қилишда давом этамиз. Айни дамда мусобақа жадвалида эгаллаб турган ўрнимиз ҳам ёмон эмас, аммо биз яхшироқ натижа қайд этишимиз керак.

- "Андижон" мухлислари жамоани қандай тарзда қўллаб қувватлашаётганини бутун Ўзбекистон кўриб турибди. Сиз жамоа сардори сифатида мухлисларга нима дея оласиз? Балки мухлисларга айтмоқчи бўлган гапларингиз бордир?

- Барчага мухлисларга катта раҳмат. Бизнинг мухлислар бутун Осиё минтақасидаги энг зўрларидан бири дея бемалол айта оламан. Мухлислар олдида қарздормиз. Биз кўпроқ ғалаба қозонишимиз ва шу тарзда қарзимизни узишимиз керак.

Абдулвосит Бектемиров суҳбатлашди