Виталий Левченко: "Муаммоли чизиқларни кучайтиришга ҳаракат қилмоқдамиз"

Про лига вакили "Янгиер" рақиблик қилган ўйинда фарғоналиклар 3:1 ҳисобидаги ғалабани тантана қилди. Ушбу баҳс якунлангач "Нефтчи" бош мураббийи Виталий Левченконинг фикрлари билан қизиқдик. 

"Ўйинни яхшилаш борасида ҳали қиладиган ишларимиз бор. Иккинчиси жисмоний ҳолатимизни оптимал даражага олиб чиқиш. Айни пайтда футболчиларга юкламалар бериляпти. Умуман олганда уларга ортиқча эътирозим йўқ.Ҳаракат қилишмоқда, интилишмоқда.  Қандай камчиликларимиз борлигини биламиз. Умид қиламанки, иккинчи давра стартига қадар маромида тайёргарлик кўрамиз",- дейди мураббий. 

- Кўрикда бўлиб турган янги футболчилар ҳақида...

- Муаммоли чизиқларни кучайтиришга ҳаракат қилмоқдамиз. Машғулотлар, ўйинлар орқали уларни кўриб олиш имконияти бўлмоқда. Айрим ўзгаришларни амалга оширишимиз мумкин. 

- Эхсони Паншанбенинг хизматига аввалдан қизиқиб келасиз. Унинг "Нефтчи"га ўтиши борасида хабарлар чиқди...

- У билан гаплашдим. Қизиқиш билдирганим рост. Лекин у Эрон клубини танлади. Эхсонига омад тилайман. Бу унинг танлови. Қаерда тўп тепиш футболчининг хоҳиши ҳисобланади. 

-  "Янгиер" билан учрашув аввалида Юрий Саркисян жамоага ўз тилакларини билдирди. Бу ҳолат қандай ҳиссиётларни берди?

- Аввал ҳам айтганман Юрий Саркисян Фарғона футболи учун кўп хизмат қилган. "Нефтчи" учун анча ишларни амалга оширган, деб ўйлайман. Юрий Вазгеновични Фарғонага стадионимиз очилишига таклиф қилишдан фақат хурсанд бўламан.

Абдулазиз Искандаров ёзиб олди