Виталий Левченко: "Агар реализация яхшироқ бўлганида, ўйин натижасини ҳал қилиб бўлган бўлар эдик"

"Сифатли ва яхши ўйин ўтказдик. Вазиятлар ҳам яратилди, аммо реализация масаласида муаммолар бор. Рикошет туфайли гол ўтказиб юбордик. Шу сабабли ўзимиз яратган вазиятлар фойдаланишимиз керак. Бугун буни уддалай олмадик. Ўйинни ва тўпни назорат қилдик" - деди Виталий Левченко баҳс якунлангач.

- Жамоа кучли таркибга эга, аммо бор-йўғи бир нафар ҳужумчи билан ўйнамоқда. Тактикани ўзгартириш вақти келмадими?

- Қайси ҳужумчи?

- Масалан, Муҳаммадали Ғиёсов.

- У қанот ярим ҳимоячиси.

- Марушич ҳам бор-ку.

- Қайдномани қарадингизми? Сиз қайдномага қарайсизми ўзи? Биринчи қайдномага қаранг ва кейин савол беринг.

- Жамоангиз тўлиқ устунлик қилганига қарамай, рақиб дарвозасига берилган зарбалар сонини бармоқлар билан санаб олиш мумкин. Бунинг сабаби нимада?

- Дарвоза тўсинини икки маротаба нишонга олдик. Булар ҳам зарба ҳисобланади. Тўп ўзи бориб қолмайди-ку. Биз ҳам кўпроқ зарбалар бўлишини истаймиз. Голни ҳам узоқ масофадан йўлланган зарба орқали киритдик.

- "Нефтчи" кўп ҳужум қилмоқда, аммо дарвоза яқинида ижро йўқ...

- Мен ҳам шуни айтяпман. Вазиятлар яратяпмиз, аммо улардан фойдаланмадик. Агар реализация яхшироқ бўлганида, ўйин натижасини ҳал қилиб бўлган бўлар эдик.

- "Қизилқум"ни қандай ўрганиб чиққан эдингиз. Яқиндагина жамоада бош мураббий ўзгарди...

- Биз мураббийлар ўзгарганига қарамаймиз. Жамоа намойиш этаётган ўйинни таҳлил қиламиз. "Андижон"га қарши ўйинда иштирок этишган эди. Албатта, кўрамиз ва ўрганамиз.

- "Қизилқум" жамоасининг ҳозирги ўйини мусобақа жадвалида нечанчи ўринга лойиқ деб ўйлайсиз?

- Жамоа намойиш этаётган ўйин, эгаллаб турилган поғонага мос. Бизда ҳам худди шундай.