Виарежодаги карнавалда Роналдунинг улкан ҳайкали намойиш этилди

Карнавалда жаҳондаги ижтимоий муаммолар мавзусида ҳайкаллар яратилади. Бу йил асосий мавзулар атроф-муҳит, муҳаббат ва замонамиз рамзлари бўлди.

Айни дамда замонамиз қаҳрамони, сайёрамизнинг энг яхши футболчиларидан бири, Инстаграм қироли ва Италия чемпиони ким? Тўппа-тўғри, Криштиану Роналду. Унинг улкан ҳайкали Виарежо кўчаларидан олиб ўтишди.

Бир қарашда Криш темирдан тайёрланган деб ўйлашингиз мумкин, аммо ундай эмас, бу ҳайкални ясаш учун шаклини ўзгартириш осон бўлган махсус қоғоз ва картондан фойдаланилган. Ҳайкал Роналдунинг барча машҳур ҳаракатларини такрорлаши ва хатто оғзини очиши мумкин. Яратувчилар бу қайси мавзуда эканлигини кўрсатиш учун IDOL сўзини қўшиб қўйишди.

Агар ушбу йирик Криштиануни кўришни истасангиз ҳали ҳам сизда бу имконият мавжуд. Уни 15, 20, 23 ва 25 февраль кунлари Виарежо кўчаларига олиб чиқишади. Роналду билан бирга Гретта Тунберг ва Дональд Трамп ҳайкаллари ҳам карнавалдагиларга намойиш этилади.

Виарежо (Флоренциядан 100 км узоқликда) карнавали 1873 йилдан бери ўтказилиб келинади. Ўша йилларда ўзига тўқ, бой инсонлар карнавал араваларида кўчаларда сайр қилишни хоҳлашган эди. Камбағаллар эса вазиятдан фойдаланиб қолиш учун кийимини ўзгартириб, маҳаллий "миллионерлар" ва сиёсатчилар устидан кулишганди.

Карнавал юқори кайфиятда ўтгани учун шаҳар ҳукумати ғояни қўллаб-қувватлашган. Жорий йил 147-карнавал ўтказилмоқда. Фестивал рамзи - масҳарабоз Бурламакко. Ушбу қаҳрамон 1930 йил рассом Умберто Бонетти томонидан ўйлаб топилган.

Футбол мавзуси Виарежога бегона эмас: 2006 йилда кўчаларда жаҳон кубогини кўтарган Марчелло Липпи ҳайкали олиб ўтилган. Эътиборингизга ушбу карнавалда намойиш этилган бошқа ҳайкал суратларини тақдим этамиз.