Вадим Абрамов: "Шўртан" гол урганидан кейин майдонда футбол тугади"

"Ғалати ўйин бўлди. Биринчи таймда бироз футбол бўлганди, иккинчи таймда гол ўтказиб юборганимиздан кейин футбол тугади. Тушунаман, "Шўртан" ҳисобни сақлаб қолишни жуда ҳам хоҳлади. Аламли мағлубият бўлди, аммо нима ҳам қила олардик", – деб гап бошлади Вадим Абрамов. 

- Бу "Динамо" учун Про лигада мавсумдаги илк мағлубият бўлди...

- Ҳа, мавсумни мағлубиятсиз якунлаганимизда зўр бўларди, аммо йигитлар аллақачон "таътилга чиқиб кетишгани" сезилди, уларда мотивация йўқлиги ҳам билинди. 

- Янги мавсум "Динамо" Суперлигада ўйнайди. Клуб қайси ўринлар учун курашади? 

- Аввал Суперлигага тайёрланиш керак. Ҳозир исталган ўринни айтишим мумкин. Менимча, ҳамма клуб мавсумни яхши ният билан бошлайди, аммо барчаси тайёргарликка боғлиқ. 

- Бугун жароҳат олиб майдонни тарк этган жамоа тўпурари Жоэль Кожонинг ҳолати қандай? 

- Жоэль қанча вақтга сафдан чиққани маълум эмас. Шифокорлар текширувидан кейин барчаси маълум бўлади. 

- "Динамо" Про лига мавсумида атиги 11 та гол ўтказди, ҳимоя чизиғидан қониқдингизми? 

- Про лига ва Суперлиганинг фарқи бор. Суперлигада муносиб ўйнаш учун марказий ҳимоячилар керак бўлади.