Вадим Абрамов: "Эртага таркибда ўзгаришлар бўлади"

- Эртага биринчи ўйин билан солиштирганда таркибда ўзгаришлар бўладими?
- Ҳа, албатта. Эртанги баҳсда баъзи ўзгаришлар бўлади. "Локомотив" ҳали ОЧЛда ғалаба нашидасини сурмаган ва биз илк ғалабани қўлга киритишни истаймиз.

- Дарвозабон борасида қарор қабул қилиб бўлдингизми?
- Ҳа, бу борада якуний тўхтамга келдим.

- Жамоа эртанги муҳим ўйинга тайёрми? Йўқотишлар йўқми?
- Жамоа ўйинга тайёр. Барча футболчилар майдонга тушишга шай ҳолатдалар.

- "Фулад" тўққиз ўйиндан буён ОЧЛда мағлубиятсиз ўйнаб келмоқда. Эртага "Локомотив" ушбу серияга чек қўя оладими?
- Раҳмат, бу маълумот ҳақида билмасдик. Биз ҳам ҳали ОЧЛда ғалаба қозона олганимиз йўқ. Эртага шу анъаналарни бузишга ҳаракат қиламиз.

- "Фулад" билан бўладиган ўйинда сиз учун энг муҳими нима?
- Энг асосийси биринчи бўлиб гол уриб олишимиз керак. "Локомотив" тезроқ ўзининг илк ғалабасини нишонлаши керак.

- Фозил Мусаев ҳозирда Эрон чемпионатида тўп сурмоқда. "Фулад" жамоаси ҳақида ундан маълумот олишга уриниб кўрдингизми?

- Ҳозирги замонда у билан бемалол телефонлашиб, боғланишимиз мумкин. Лекин мен Фозил Мусаев "Фулад" жамоаси ҳақида биздан кўпроқ маълумотга эга дея олмайман. У шунчаки "Фулад" жамоаси географик жойлашуви ҳақида билиши мумкин. Шу боис унга сим қоқиб, ниманидир билишга ошиқмадик. Агарда у "Фулад"да ўйнаганида ҳам бирор нарсани сўрасак бўларди.

Темур Кападзе: Эрон жамоалари деярли бир хил ўйнашади. Улар жисмонан анча кучли рақиб ҳисобланишади. Биринчи ўйинда йўл қўйилган хато ва камчиликларни такрорламасликка ҳаракат қиламиз. "Ал Ҳилол" билан бўлган ўйиндаги мағлубиятни унутганмиз ва бор диққат-эътибор "Фулад" билан бўладиган ўйинга қаратилган. Умид қиламанки, эртага мухлисларга ғалабани тақдим этамиз.