Улуғбек Бакаев: "Профессионал футболчи керак бўлса дарвозага ҳам туришга тайёр бўлиши керак"

Ўйин ҳақида

- Кубок ўйини бўлгани учун ёш футболчиларни синаб кўрдик. Улар ёмон ўйнашмади, яна гол уришимиз мумкин эди, аммо бу футбол. Ҳакамнинг охирги ҳуштагигача ўйнаш керак. Ким нимага қодирлигини кўриб олдик, улар орасидан баъзиларга Суперлигада кўпроқ имконият берамиз. Кубокдаги мақсадимиз гуруҳдан чиқиш, ҳали ҳаммаси олдинда. Бир очко ҳам натижа, барча йигитларга раҳмат айтаман, стадионга келган томошабинларга миннатдорчилик билдирамиз.

- 28 рақамдаги футболчи (Соҳиб Муҳаммадиев) ҳақидаги фикрларингиз... 

- Ёш футболчи, кўриниб турибди гол уришга истаги ва хоҳиши жуда катта, аммо маҳорат ва тажриба етишмади. Умид қиламанки, ўйиндан-ўйинга кучайиб боради ва жамоага кўпроқ фойда келтиради.

- Иминов икки ўйиндан буён ўнг қанот вингери сифатида ўйнамоқда, аммо ўйини қовушмаяпти. Балки уни марказга қайтарган маъқулдир... 

- Бизга ҳозир ҳар бир ўйинда натижа муҳим, шу боис қайсидир футболчини ўзи хоҳлаган жойда эмас жамоага фойда келтирадиган жойда ўйнатамиз. Профессионал футболчи вазият тақозо этса дарвозага ҳам туришга тайёр бўлиши лозим.