U-20 Осиё кубоги. Анвар Ғофуров: "Яман билан ўйинда керакли натижа қилинди, бу босқичда осон рақиб кутиш хато"

Бу ўйиндаги ғалаба вакилларимиз учун кейинги босқич эшикларини очади. Аввалги турдан аввал тажрибали ёшлар мураббийи Жамолиддин Раҳматуллаев мулоҳазаларини билдирган эди. Иккинчи тур учрашуви олдидан яна бир мутахассис Анвар Ғофуровнинг фикрларини тингладик. 

- Ёшлар терма жамоамизнинг Яманга қарши ўйини қандай таассурот қолдирди? Ҳавотирли кечган иккинчи бўлимчи?

- Аввалги турда биринчи ўйинимиз бўлишига қарамасдан жамоамиз яхши ҳаракат қилди ва чакки таассурот қолдиргани йўқ. Айниқса биринчи бўлимни айтиб ўтмоқчиман. Иккинчи бўлимда Яман терма жамоаси ўйинда ва ҳисобда ўзгариш қилишга ҳаракат қилди, бор имкониятини ишга солди. Натижада гол уриш учун имконият яратишни бошлади. Бизнинг жамоа эса аксинча ҳисобни сақлаб қолишга ҳаракат қилди. Энг асосийси керакли натижа қўлга киритилди. 

- Биз оддий деб қараётган рақиблар ҳам муносиб қаршилик кўрсатмоқда. Жамоамиз ҳали бор салоҳиятини кўрсатгани йўқми?

- Албатта. Бу босқичда осон рақибни кутиш жуда нотўғри фикр. Ҳар бир рақибни ҳурмат қилиш керак. Кўп мамлакатларда футбол йилдан-йилга ривожланмоқда. Замонавий футбол талаблари ҳам ошиб бормоқда. 

- Индонезия билан ўйиндан аввалгисидан фарқ қилишини кутишимиз мумкинми? 

- Биринчи турда ким қандай натижа кўрсатганига эътибор бермаслигимиз керак. Майдонга тушган ҳар бир футболчи ўзининг энг яхши ўйинини ва мураббийлар кўрсатмаларини бажаришга ҳаракат қилиши зарур. Терма жамоамиз яхши футболчилардан шаклланган. Ўйлайманки, бугун улар яхши натижа кўрсатишади. 

- Футболчиларнинг илк турдаги ҳаракатларига қандай баҳо берасиз? Тўлқинбековнинг бошқа позицияда ўйнаётгани унинг имкониятларини чекламаяптими?

- Азиз Тўлқинбеков учун бу позиция бегона эмас. Азиз кўплаб ўйинларда айнан шу жойда тўп тепган ва яхши таассурот қолдирган. Шунинг учун ҳам мураббийлар унга ишонч билдиришмоқда.