U-19 ОЧ: Ўзбекистон БАА билан ўйиндан олдинги машғулотларини ўтказди

Кечаги машғулотларда Индонезияга қарши ўйинда жароҳат олиб майдонни тарк этган ҳимоячи Одил Ҳамробеков, ҳамда кичик жароҳати бўлган терма жамоа сардори Жавоҳир Соҳибовлар иштирок этишмади.

Бугун Равшан Ҳайдаров шогирдлари Тошкент вақти билан 17:00да (маҳаллий вақт билан 18:30да) БАА терма жамоасига қарши майдонга тушишади. Индонезия ёшлар терма жамоаси эса, 2-турда Австралия билан куч синашади

Эслатиб ўтамиз, илк турда Ўзбекистон ёшлари Индонезия устидан 3:1 ҳисобида ғалаба қозонган бўлсалар, Австралия ва БАА ўртасидаги ўйинда 1:1 ҳисоби қайд этилган.

Кеча, мусобақанинг «A» ва «C» гуруҳларида 2-тур ўйинлари ўтказилди. Жумладан «А» гуруҳида дастлабки ўйинда Таиландга мағлуб бўлган Эрон бу сафар Яман терма жамоасига ҳам мағлуб бўлди - 0:1 ва мусобақадан муддатидан олдин чиқиб кетди. Даслтабки турда Эронни мағлубиятга учратган Таиланд эса, мезбон - Мьянма ёшларига йирик 0:3 ҳисобида мағлуб бўлди.

Мусобақанинг «C» гуруҳида ҳам кеча икки учрашув бўлиб ўтди. Дастлабки турда Японияни мағлуб этган Хитой ёшлари Жанубий Корея билан ўйинда 0:0 ҳисобида дуранг ўйнаган бўлса, Япония Вьетнамни мағлубиятга учратди - 3:1.