Трент: "Мавсумдаги энг муҳим ўйин"

"Хоҳ уйда, хоҳ сафарда бўлсин, бу мавсумдаги энг муҳим ўйин. Бу учрашув бошқаларидан ажралиб туради. Албатта, айни дамда жамоаларнинг мақсадлари турлича. Бироқ жамоалар қайси ўринларда бўлишидан қатъий назар мухлислар учун принципиаллик доимо сақланиб қолган.

Ўзгача ўйин. Бу "Энфилд"! Мухлислар ҳам, футболчилар ҳам бу ўйинни доимо кутишади. Бу муҳим ўйин, буни барча яхши билади. Бу ўйиндаги ҳиссиётлар бошқа ўйинлардагидан бошқачароқ бўлади. Балки, бу мавсумда энг кўп кўрилган ўйинимиз бўлиши ҳам мумкин. Чунки бу дунё миқёсидаги баҳс.

Фақатгина ғалаба керак. Бу асосийси. Шундай кайфият билан майдонга тушаман. Одамлар МЮнинг ҳозирги ҳолати, клубнинг ичидаги гаплар ва натижалар ҳақида кўп гапиришмоқда. Албатта, бунга етарлича сабаблар бор. Бироқ футболчилар учун фақатгина футбол ўйини керак.

Шунчаки биз жадвалда етакчи бўлиб турганимиз учун ҳисоб 1:0 билан бошланмайди. Илк ҳуштак чалинганида таблода ҳисоб 0:0 бўлади, икки томонда 11 нафардан футболчи майдонга тушади ва бир хилда имконият тақдим қилинади.

Бундай учрашувларда жамоаларнинг қандай ҳолатда эканлиги ҳеч нимани англатмайди. Гап ким кучлилигида эмас, ким вазиятларидан яхши фойдалана олишида", - деди Трент.