Тошкент «Ҳоким кубоги» мусобақаларининг барча ғолиб ва совриндорлари аниқланди

Миллий Олимпия қўмитаси ташаббуси билан ўтказилаётган мусобақа уч ҳил спорт тури – мини-футбол, волейбол ва стол тенниси бўйича ташкил этилди.

Бугун, 15 май куни Ўзбекистон футбол ассоциациясига қарашли сунъий қопламали майдонда «Ҳоким кубоги»нинг ҳал қилувчи финал ўйини бўлиб ўтди. Унда Тошкент шаҳар прокуратураси ҳамда «Тошшаҳарбозорсавдо» уюшмаси жамоалари ўзаро ҳисоб-китоб қилиб олишди.

Кескин ва муросасиз кечган баҳснинг асосий вақтида 2:2 ҳисобидаги жанговар дуранг қайд этилди. Қўшиб берилган вақтларда ҳам кучлар тенг келди. Шундан сўнг ғолиб пенальтилар сериясида аниқланди. Унда «Тошшахарбозорсавдо» уюшмаси жамоаси 2:1 ҳисобида ғалаба қозонди ва мусобақа ғолибига айланди.

Баҳс якунига етгач, стол тенниси, волейбол ва мини-футбол бўйича беллашувларда муваффақиятли иштирок этган жамоаларни тақдирлаш маросими бўлиб ўтди.

Унда Тошкент шаҳар ҳокими ўринбосари Шуҳрат Бакиев ҳам қатнашди. Тадбир давомида иштирокчиларга махсус диплом, кубок ва совғалар тақдим этилди.

Маросим давомида спорт фахрийси, Ўзбекистонда хизмат кўрсатган ёшлар мураббийи Ахбор Имомхўжаев сўзга чиқиб, беллашувлар қизиқарли кечганини, спорт билан мунтазам шуғулланиш лозимлигини алоҳида қайд этиб ўтди. Ғолиб ва совриндорларни ушбу муваффақият билан табриклаб, келгуси фаолиятида омадлар тилади.

Уч ҳил спорт тури бўйича ўтказилган «Ҳоким кубоги» баҳсларида ғолиб ва совриндорлар рўйхати қуйидагича кўриниш олди:

Мини-футбол:

1-ўрин: “Тошшаҳарбозорсавдо” уюшмаси
2-ўрин: Тошкент шаҳар прокуратураси
3-ўрин: “Сувсоз” ДУК

Волейбол:

1-ўрин: Тошкент шаҳар Маънавият ва маърифат бошқармаси
2-ўрин: Тошкент шаҳар Халқ таълими бош бошқармаси
3-ўрин: Давлат рақобат қўмитасининг Тошкент шаҳар бошқармаси

Стол тенниси:

1-ўрин: “Тошшаҳарбозорсавдо” уюшмаси
2-ўрин: Тошкент шаҳар Халқ таълими бош бошқармаси
3-ўрин: Тошкент шаҳар телефон тармоқлари унитар корхонаси