Топ даражага кўтарилган Мауро

ТОП ДАРАЖАГА КЎТАРИЛГАН МАУРО
Европа Чемпионлар Лигаси гуруҳ босқичидан ўрин олган "Интер" ҳамда "Барселона" жамоалари ўртасидаги ўйинда кўпчилик Лионель Мессининг майдонга қайтишини ва яна қаҳрамонга айланишини кутганди. Лекин шу куни бошқа бир аргентиналик футболчи қаҳрамон бўлди. "Интер" сардори Мауро Икарди ўйин сўнгида гол уриб жамоасини мағлубиятдан қутқариб қолди. Икарди янги мавсумни кўтаринки кайфиятда ўтказмоқда ва энди уни бемалол топ футболчилар сирасида санасак бўлади.

БEЗОРИ
Тўғрисини айтиш керак, бир неча йил олдин Мауро Икарди деганда кўпчилик собиқ жамоадошининг хотинини олиб қочиб кетган безори футболчини тушунарди. Унинг Ванда Нара билан ишқий муносабатлари ҳеч кимга сир эмас. Лекин энди Икардининг ўтмиши ҳақида кўп ҳам гапиришмаяпти. Чунки Мауро шунчалик яхши ўйнаяптики, унинг футболдаги даражаси ҳар қандай воқеалардан юқорига чиқди. Футболчи ўзининг автобиографиясини чоп этганидан кейин "Интер" мухлислари ҳам уни ёмон кўриб қола бошлаган ва буни очиқ-ойдин намойиш этишни бошлашганди. Бироқ Мауро ўз устида ишлашда давом этди ва клуб сардорига айланди.

УНИ НИМА УЧУН ЁМОН КЎРИШАРДИ?
"Интер" мухлислари Икардини ёмон кўришларига сабаб унинг автобиографиясида эълон қилинган қуйидаги воқеа эди: "Биз "Сассуоло" билан ўйнаётгандик. Мен 83-дақиқада захирадан майдонга тушдим ва ўйиндаги ягона голни урдим. Мухлислар эса бизни олдиларига чақиришди. Фредди Гуарин билан мухлислар олдига бордик. Улар мени гол урган бўлишимга қарамай, ҳақорат қила бошлашди. Мен эса мухлислар орасида менга қўлини кўтараётган болакайни кўрдим. Унга футболкамни ечиб бердим. Болакай шунчалик хурсанд бўлдики, буни кўриб мен ҳам қувондим. Шунда "ултра мухлислар" (бундай турдаги мухлислар Европанинг кўп клубларида бор. Улар учун футболнинг унчалик қизиғи йўқ. Бундай мухлислар стадионларда ҳар хил портловчи воситалар тутатиш ва жанжал чиқаришни ўзларининг бурчлари деб билишади. Кўпчилик бундай мухлисларни жамоаси таркибини ҳам билмайдиган деб ҳазил қилади – муаллиф) қаторидан бир киши келиб формани болакайни қўлидан олиб менга қайтариб улоқтирди. Бундан жаҳлим чиқиб "Сен ифлос болани хафа қилиб хурсанд бўласанми?", деб унга бақирдим. Кийиниш хонасида мени қаҳрамонлардек кутиб олишди. Чунки ҳали ҳеч кимнинг "ултра мухлислар" етакчиси билан гаплашишга ҳадди сиғмаганди".

Икардининг китобида бу ҳикоя эълон қилингач мухлислар клубга расмий мурожаат билан чиқишади: "Икарди бизнинг сардоримиз бўлишга муносиб эмас. У ҳеч қачон бўлмаган воқеани тўқиб китобида чиқарди. "Интер"нинг сардори тажрибали, ақлли ва салобатли бўлиши керак. Икарди, сен биз учун ўлгансан, мазхарабоз", деб ёзилганди мурожаатда. Бундай сўзлар жамоанинг уй учрашувларида баннер кўринишида ҳам намоён бўлганди. Бироқ 23 ёшида "Интер" сардори бўлган Мауро ҳеч кимга эътибор бермай ўз ишини қилаверди. Уни бекорга клуб сардори этиб тайинлашмаган. Чунки Икарди А Серияда нақд 25 та гол урганди. Клубнинг кўплаб собиқ футболчилари 23 ёшга ҳам тўлмаган Икардига сардорлик боғичини бериш тўғри эмаслиги ҳақида гапиришди, бироқ энг асосийси клубнинг афсонавий сардори Хавьер Занетти ҳамюртини яхши кўрарди. У бир неча бор Икардининг клуб учун қанчалик муҳим эканини таъкидлаган.

"МEН – САРДОРМАН"
Мауро Икарди "Интер" билан янги шартнома имзолаганида маошининг камайишига ҳам рози бўлганди. Клуб молиявий фейр-плей шартларини бажариш учун Икардига ўзи хоҳлаганидан 1,7 миллион эвро таклиф маош белгилайди. Мауро эса бунга рози бўлади. Ваҳолангки, унда Англия ва Италиянинг ўзидан каттароқ маош таклиф қилишганди. Икарди "Реал"нинг унга қизиқиш билдиргани ҳақида шундай деганди: "Мен "Интер" сардориман ва ҳеч қаерга кетмоқчи эмасман".

АФСОНАЛИК ТОМОН ЙЎЛ
Икарди борган сари клубнинг етакчисига айланмоқда. Ҳужумчи "Интер"  учун энг асосий ўйин ҳисобланган Милан дербисида айниқса ёрқин ўйнамоқда. Ўтган мавсумда у "Милан" дарвозасига учта гол урганди. Яқинда эса қўшимча дақиқаларда гол уриб Милан дербисида жамоасига ғалаба келтирди. "Интер"  – "Милан" тўқнашувларидаги "нерадзуррилар"нинг охирги бешта голига ҳам айнан Икарди муаллифлик қилган. У "Интер"  сафида дербида учта гол урган тўртинчи футболчи бўлди. 1960 йилдан буён "Интер" нинг ҳеч бир футболчиси А Серияда 25 тадан кўп гол урмаганди. Икарди ўтган мавсумда Италия чемпионатида 29 та гол урди. Златан Ибрагимовичдан кейин эса ҳеч бир "Интер"  ҳужумчиси чемпионатда ҳаттоки 25 та гол уролмаганди. Икарди 4 мавсум кетма-кет чемпионатда камида 10 та гол урган Кристиан Вьеридан кейинги илк "Интер"  футболчиси бўлди. Мауро Милан дербисида кетма-кет 5 та гол урган охирги ярим асрдаги илк футболчи ҳам ҳисобланади. Бунақа рекордлардан унинг ҳисобида жуда кўп.

"Интер" нинг сўнгги йиллардаги бошқа футболчиларига ҳурмат сақлаган ҳолда айтишимиз керак, Икарди клуб учун охирги йиллардаги энг муҳим футболчи бўлмоқда. Клуб Моуриньо билан Чемпионлар Лигасини ютганида мураббий ва кўплаб етакчи футболчилар бошқа жамоага ўтиб кетишганди. Икарди эса унга таҳдид қилишганига қарамай, ҳамон "Интер" либосида. Бунга эса биргина сабаб бор: унинг клубга бўлган меҳри. Биз унинг Занетти каби афсонавий сардорга айлана олишини тахмин қилмаяпмиз, лекин Икарди ноодатий сардор. Бундай ажойиб футболчининг қаршиликларга қарамай кучайишда давом этаётганини кузатиш эса барча учун ёқимли.