Токио Олимпиадасида қатнашган ЖАР футболчиси отиб кетилди

"Кайзер Чифс" ҳимоячиси Люк Флерс Йоханнецбург чеккасида ўлдирилди. Жиноят ёқилғи қуйиш шохобчасида содир бўлган. Флерснинг олдига қуролланган одамлар келиб, қурол билан таҳдид қилган ва машинадан тушишни буюрган. 

Сўнгра футболчига қарата ўқ узилган. Жиноятчилардан бири Флерснинг машинасида қочиб кетган. Қотилларнинг мақсади машинани ўғирлаш бўлган. 

Люк Флерс касалхонага ётқизилган, бироқ у ердаги шифокорлар футболчининг ҳаётини сақлаб қола олишмаган. 

"Кайзер Чифс" фожиали хабарни тасдиқлади ва Флерснинг оиласи ва яқинларига ҳамдардлик билдирди.

Эслатиб ўтамиз, Люк Флерс ЖАР терма жамоаси сафида Токио Олимпиадасида иштирок этганди.