Терма жамоа ва футболчилар

Фикримизни Осиё мисолида давом эттирадиган бўлсак, Эрон термасида ўйнаган Ризо Гучаннажод, Сардор Азмун каби футболчилар ўз терма жамоалари билан хайрлашдилар. Азмун ҳали ёш ва у эҳтимол кейинроқ фикридан қайтиб қолиши мумкин. Шунингдек, Япониядан уч футболчи терма жамоа билан хайрлашишга қарор қилди: Макото Хасебе, Кейсуке Хонда ва Готоку Сакай.

Бироз ўтиб терма жамоадан кетдим деган хабар Саудия Арабистони, Австралия ва Жанубий Корея футболчиларидан ҳам чиқиб қолса ажаб эмас. Шу ўринда савол туғилади: футболчилар қайси сабабларга кўра терма жамоа билан хайрлашишади?

Биринчидан, ёш бўйича. Ўз терма жамоасида анча йил тўп тепган футболчи ёши катталиги боис ўзидан кичикларга жой бўшатишни истайди ва ўз хоҳиши билан жамоадан кетади. Одатда бундай ўйинчиларни кўпчилик олқишлаб кузатиб қўяди.

Иккинчидан, терма жамоада ўйини қовушмаса футболчи кетиш пайига тушиб қолади ва буни ОАВ орқали маълум қилади. Эътиборни фақат клуб миқёсидаги ўйинларга қаратишни хоҳлайди. Бу тоифадаги футболчиларни ҳам раҳмат айтиб кузатиб қўйишади.

Учинчидан, яхши ўйнаб турган бўлади-ю, лекин баъзи муаммолар сабаб терма жамоадан кетиб қолади. Айтайлик, бош мураббий билан чиқиша олмаслик, федерация билан боғлиқ тушунмовчилик ёки оиласида юзага келган муаммолар туфайли. Масалан, Сардор Азмун оиласидаги муаммолар сабаб кетишга қарор қилди.

Хуллас, терма жамоадан кетаман деса сабаблар кўп. Керак пайтда вазифа бажарилмаганидан кейин юлдузлар ҳам кетиш пайига тушиб қолишлари мумкин. Ким билади дейсиз, балки тез орада Месси, Роналду каби юлдузлар ҳам терма жамоа билан хайрлашишлари мумкин.

Бунинг сабаби боиси шундаки, терма жамоа юки ниҳоятда оғир. Жаҳоннинг манаман деган клубидан ҳам оғир. Терма жамоа учун ўйнаш ниҳоятда катта масъулият талаб этади. Машҳур футболчи эҳтимол энг кучли клубда ўйнаб кета олмас, шунда бошқа клубга ўтиб ризқини териб юраверади. Лекин ҳамма учун миллий терма жамоа битта! Агар сен ўйнай олмасанг, танлаш учун бошқа жамоа бўлмайди. Ё ўйнайсан ёки хайрлашасан. Бошқа йўл йўқ.

Мана шунинг учун ҳам терма жамоа футболкаси залворли ҳисобланади. Энди ўзимизнинг миллий жамоамиз ҳақида гапирадиган бўлсак, ўтган йил жаҳон чемпионатига чиқишимизга бир қадам қолганди. Вазифа бажарилмагач, федерация ўз ишини қилди: бош мураббий истеъфога чиқарилди. Аммо охирги саралашда ўйнаган айрим футболчилар ҳалиям бир қарорга келгани йўқ. Чунки уларнинг ўзи ҳали билмайди: терма жамоадаги фаолиятни тугатишдими ё йўқми.

Билганимиз шуки, ўтган йил Тимур Кападзе футболчилик фаолиятига якун ясади ва буни баралла эълон қилди. Кейинроқ Гейнрих ҳам буни расман маълум қилди. Энди футболчи сифатида уларнинг хизматидан фойдалана олмаслигимизни биламиз. Буёғи эса янги келадиган бош мураббийнинг ҳукмига ҳақола. У кимларни чақиради, қайси йўналишда иш олиб боради, шунга кўра кейинги режалар аён бўлиб бораверади.

Ҳозирда кўпчилик футболчилар янги бош мураббийни кутишмоқда. Чунки улар ҳам шунга кўра иш юритмоқчи. Масалан, Сервер Жепаровдан терма жамоадаги тақдири ҳақида сўраганимизда бош мураббий ким бўлиши ва шунга қараб бир қарорга келишини айтганди. Эҳтимол, бошқа ўйинчилар ҳам шу фикрда бўлсалар керак.

Биз ҳозирча янги бош мураббий ким бўлишини, у қайси йўлдан юришини билмаймиз. Тайёр ўйинчилардан фойдаланадими ёки таркибни ёшартириш устида ишлайдими, буни ҳам билмаймиз. Лекин биз хоҳлардикки, бундан кейин бош жамоамизнинг ўзаги асосан қишда U-22 Осиё чемпионатида ғолиб чиққан футболчилар бўлса. Ахир улар ҳам анча катта бўлиб қолишди.

Жанубий Корея гуруҳдан чиқа олмаган бўлса-да, охирги турда амалдаги жаҳон чемпиони Германия ютганига қарамай, федерация мавжуд таркибни тарқатиб юборишга қарор қилди. Энди улар Осиё ўйинларида қатнашадиган таркиб орқали янги жамоа йиғишмоқчи. Агар бу жамоа кейинги йил январда Осиё Кубоги мусобақасида иштирок этса, қарабсизки жаҳон чемпионатининг кейинги саралаш босқичида ҳам шулар ўйнайди.

Бу билан Жанубий Кореянинг кейинги тўрт йил учун режа тузаётгани кўриниб турибди. Бизда эса мана шундай режа йўқ ҳозир. Чунки режа тузадиган мураббийнинг ўзи йўқ. Ҳали қачон янги мураббий тайинланади, қачон у ишга киришади, қишгача нималар қилади - буни ҳам билмаймиз. Мана кечагина Осиё Кубоги стартига олти ой қолди деган хабар чоп этдик. Вақт тез ўтаётганидан ҳализамон бир ой қолди деган хабар ҳам чиқади. Кўриб турганингиздек, тезроқ ҳаракат қилмасак яна бошқалардан ортда қолиб кетишимиз мумкин.

Ростини айтсам, менга Жанубий Корея танлаган йўл маъқул келди. Улар янги тузиладиган таркиб билан ҳам Осиё Кубогида яхши иштирок этишга ҳаракат қилишади. Чунки Осиё ўйинлари бу мусобақа олдидан тайёргарлик вазифасини ўтаб беради. Ундан кейин шу таркибни пишитиб ЖЧ-2022га тайёргарликни бошлашади.

Хўш, биз нима қиламиз? ЎФАнинг бу борадаги режалари қандай? Миллий терма жамоамизнинг кейинги таркиби қандай кўринишда бўлади? Олдинги саралашда ўйнаганлардан кимлар чақирилади-ю, кимларга эшик ёпилади? Агар буни тезда ҳал қилмасак, юқорида айтиб ўтганимиздек, баъзи футболчилар терма жамоадан кетган-кетмаганини билмасдан иккиланиб юраверишади.