Темурхўжа Абдухолиқов: "Таиландни ютганимиз бизга руҳий томонлама ёрдам беради"

"Таиланд билан ўртоқлик учрашуви қийин бўлди. Йигитлар билан бир-биримизни тушуниб кетишимиз бироз қийин кечди. Таиланд терма жамоаси ҳам бекорга Жаҳон чемпионати саралашининг сўнгги босқичига етиб келмаганини исботлади. Аммо бугунги натижа у қадар муҳим эмас эди, асосий эътиборимиз Эрон билан ўйинга қаратилган. Бугун катта ҳисобда ютамизми ёки ютқазамизми асосийси Эрон билан баҳсда ижобий натижа қайд этиш керак.

Гол бўлган вазиятга келадиган бўлсак Элдор менга тўпни қулай тарзда узатди, ўша ҳолатда тўпга оёғимни қўйиб дарвозани ишғол қилиш ҳақида ўйладим холос. Яхшики дарвозабонни пойламадим ва гол урдим.

Бугун ғалаба қозонганимиз яхши бўлди. Йигитларга руҳий томонлама бу ёрдам беради. Агар Таиландни мағлуб эта олмаганимизда бироз салбий кайфият ҳукмрон бўларди. Эронга қарши баҳсга барча йигитлар жанговор кайфиятда боришади", - дейди Темурхўжа Абдухолиқов.