Темурхўжа Абдухолиқов: "Бунёдкор"ни қийин вазиятдан олиб чиқиб кетиш ўз қўлимизда. Бизга четдан ҳеч ким келиб ёрдам бермайди"

"Қизилқум" ва "Андижон"дан учралган мағлубият кутилмаган ҳолат сифатида баҳоланди. Шунга қарамай жамоа кейинги баҳсларда ўз ўйинини топиб олди. Чемпионлик учун курашаётшган "Навбаҳор"дан очко олган "қалдирғочлар" кейинги баҳсда ОКМКга жиддий қаршилик кўрсатди. "Динамо" билан дуранг қайд этди. Ҳар бир ўйинда сўнгги дақиқаларгача рақибларини қийнаб қўяётган жамоада натижа йўқ. Олдиндаги Ўзбекистон Кубоги учрашувлари эса руҳий томонлама ишонч берса ажаб эмас. Жамоа сардори Темурхўжа Абдухолиқов жамоадаги вазият ва тайёргарлик жараёнлари билан ўртоқлашди. 

"Жамоани қийин вазиятдан олиб чиқиб кетиш ўз қўлимизда. Бизга ҳеч ким четдан келиб ёрдам бермайди. Фаолиятимда бундай вазиятларга кўп дуч келганман. Аввалги натижаларни унутишимиз керак, тамом. Кўряпсиз вазиятлар яратмоқдамиз. 3та ўйинда ҳам назорат қилдик. Фақат ва фақат харакат қилиш, ишлаш керак. Бўлажак ўйинларда очко олишни истасак тарихга эмас, олдинга қараб интилишимиз зарур. Кубок баҳсларига тўхталсам, осон жамоа қолмаган. Айниқса Тошкент клубларига қарши рақиблар бошқача куч билан харакат қилади. Ўзини кўрсатиш учун бор кучини ишга солади. Бизга эса ғалаба зарур",- дейди Темурхўжа Абдухолиқов.