Танишинг: “Марк Старс” футбол клуби Тошкентда

Маълум бўлишича, бу жамоанинг Грузия биринчи лигасида ҳам фарм-клуби бор экан. Бундан бир ойча муқаддам интернет сайтларда бир гуруҳ африкалик футболчилар пойтахтимизда ўзларига жамоа излаб юришгани ҳақида хабарлар чиққанди. Аниқ бўлишича, ўша футболчилар “Марк Старс” клуби аъзолари экан. Куни кеча бу жамоа биринчи лига вакили “Оқтепа”га қарши ўртоқлик ўйинида майдонга тушиб, 1:1 ҳисобини қайд этди. Баҳс якунига етгач, биз “Марк Старс” бош менежери Жерри Эмонкпайридан интервью олдик. Мухлислар яхши билишса керак, Жерри Эмонкпайри ўз вақтида олий лигамизда тўп сурган бўлиб, “Сўғдиёна” ва “Металлург”да ўйнаган. У айни пайтда футболчилик фаолиятини давом эттириш билан бирга мураббий ва менежер вазифасини ҳам бажармоқда экан.

ЖЕРРИ ЭМОНКПАЙРИ: “БИЗ ШУНЧАКИ ЖАМОА ЭМАСМИЗ”

-   Жерри, аввало “Оқтепа” билан ўйиндан олинган таассуротлар ҳақида...
-   Ўйинда тезкор голлар киритилди. Бу эса баҳснинг янада қизиқарли кечишини таъминлади. Умуман олганда, менга учрашув ёқди. Бу Тошкентга келганимиздан бери биринчи ўйинимиз бўлди, шу боис жамоадаги ҳамма ҳам яхши ўйин кўрсата олмади. Футболчиларимиз мана бир ойдирки шу ерда машғулот ўтказишяпти. Жамоанинг расмий номи – “Марк Старс” футбол клуби. Мен менежер сифатида бу жамоани бошқаряпман. Биласизми-йўқми, Ўзбекистонда тўп сурганимда шу ерлик қизга уйлангандим. Шунинг учун ҳам юртингиз мен учун бегона эмас. Натижада футбол клубимизнинг мавсумолди тайёргарлигини Ўзбекистонда ўтказишни маъқўл кўрдик. Менинг мақсадим – Африкадан яхши савиядаги футболчиларни олиб келиб, ўзбек клубларига жойлаштириш.
 
-   Тошкентга нечта футболчи келган?
-   Ҳозирча 19 нафар ўйинчимиз шу ерда. Шу ойнинг охирларида энг кучли футболчиларимиз ҳам келишади. Чунки февралда ПФЛ Кубогида қатнашишни мақсад қилганмиз. Мен бу борада ПФЛ бош директори Фарҳод Магометов билан гаплашдим ва у киши мусобақадаги иштирокимизга рухсат берди.
 
-   Футболчиларнинг барчаси Нигерияданми?
-   Йўқ. Икки нафари Кот-Д‘Ивуардан, яна иккитаси яқинда Ганадан келади. Футбол клубимиз таркибида жами 30га яқин футболчи бор.
 
-   Жамоанинг логотипи “Бунёдкор”никига жуда ўхшаб кетар экан.
-   Ҳа, шундай. Кўпчилик бизни “Бунёдкор” кийинтирган деб ўйлаяпти экан. Лекин жамоамизнинг “Бунёдкор”га умуман алоқаси йўқ. “Марк Старс” футбол клуби ҳам Нигерияда, ҳам Грузияда фаолият олиб бормоқда. Мана энди Ўзбекистонда ҳам олий лига клублари билан ҳамкорликни йўлга қўйсак чакки бўлмасди.
 
-   Шу вақтгача олий лиганинг бирорта жамоасидан ўйинчиларга қизиқиш бўлдими?
-   Биз энди биттагина ўйин ўтказдик, шу боис кўпчилик “Марк Старс” ҳақида билмайди. Мана энди назорат беллашувларини кўпайтирамиз, шунингдек, ПФЛ Кубогида ҳам иштирок этамиз. Ўйлайманки, ҳали олий лига клубларидан футболчиларимизга таклиф бўлади.
 
-   Маълумки, ПФЛнинг легионерлар борасидаги талабларига кўра, четдан келаётган футболчи олий лига клубида, шунингдек терма жамоада ҳам тўп сурган бўлиши керак.
-   Бугун майдонга тушган жамоамиз сардори Нигерия олий лигасида ўйнаган. У – яхши савиядаги футболчи. Яна қайтариб айтаман, Тошкентда ҳозир шуғулланаётганлар асосий ўйинчиларимиз эмас. Энг кучли футболчилар энди келишади.

-   Бу ерда яшаш, овқатланиш ва машғулот ўтказиш қандай бўляпти?
-   Катта ҳовлини ижарага олганмиз ва ўша ерда турибмиз. Овқатланиш ҳам жойида. Машғулотларни эса “Ўзбекфильм” киностудияси ёнидаги сунъий майдонда олиб боряпмиз. Мен футболчилар яхши еб, яхши шуғулланиши қўлдан келганча ҳаракат қиляпман.
 
-   “Марк Старс”ни молиявий таъминлаш ким томонидан амалга оширилади?
-   Нигерияда бизга ҳомийлик қилаётган одамлар бор. Шунингдек, Грузияда ҳам танишларимиз кўп. Улар жамоамизни ҳар томонлама қўллаб келишяпти. Бир сўз билан айтганда, биз шунчаки жамоа эмасмиз.

Мана, “Марк Старс” футбол клуби бош менежери Жерри Эмонпайрининг интервьюси билан танишиб чиқдингиз. Жамоанинг Тошкентга келишдан мақсади маълум: ўртоқлик ўйинларида футболчиларни реклама қилиб олиш ва шу орқали олий лига клубларига жойлаштириш. Жерри Тошкентга олиб келган футболчилар олий лигада ўйнаб кета олишадими-йўқми, ҳозирча бу ҳақда бир нарса дейиш қийин. Аммо ПФЛнинг легионерларга қўйган талаблари бўйича бизнинг чемпионатга четдан келаётган футболчи кучли, шу билан бирга ўзбек футболини ўстира оладиган даражада бўлиши лозим. Қуйида айнан легионерларга қўйилган баъзи талабларни келтириб ўтамиз.

-   Легионер футболчи агар Европадан келган бўлса, олий ёки биринчи лига клубида тўп сурган бўлиши шарт. Агар Осиё ва Африкадан бўлса, унда фақат олий лига клубидан келган бўлиши керак;
-   Легионер футболчи ўз жамоасининг охирги мавсум ўйинларида камида 60 фоиз иштирок этган бўлиши керак;
-   Ўз миллий терма жамоасида эса бештадан кам бўлмаган ўйинда тўп сурган бўлиши талаб этилади;
-   Олимпия ёки ёшлар терма жамоасининг охирги саралаш баҳсларининг камида 70 фоизида қатнашган бўлиши керак;
-   Агар легионер шу талабларга мос келмаса, унда клуб ўша футболчини ўз таркибига қўшиб олиш учун ПФЛ ҳисоб-рақамига 50 миллион сўм ўтказиб бериши зарур бўлади.
-   Бундан ташқари, Ўзбекистон чемпионати ва Кубогида қатнашадиган клуб ўз штатидаги ҳар бир Ўзбекистон фуқароси бўлмаган шахс учун (футболчи, мураббий, мутахассис) 3 миллион сўм миқдорида ПФЛга тўлаб бериши лозим.

Хайрулла ХОЛИҚОВ.