"Сурхон" ФК: "Футболчиларга 3 ойлик маошлар тўланган. Ваҳимага ўрин йўқ. Хомяков билан узоқ вақт давомида музокара олиб борилди"

Ушбу интервью эълон қилингач,  мухлис ва мутахассислар томонидан турлича фикрлар билдирилди. 

"Сурхон"даги ички муҳит, қарздорликлар, бир кун ишлаган Хомяков", - сербиялик футбол агентидан сенсацион иқрорликлар         

"Сурхон" футбол клуби эса ушбу маълумотларга нисбатан қуйидагиларни маълум қилади:

- "Сурхон" футбол клубида тўп сураётган Сербиялик легионерлар Дарко Станоевич ва Владимир Бубаньялар билан 2019 йили тўлиқ (100%) ҳисоб-китоб қилган ва ушбу футболчиларнинг шартномаси 2019 йилнинг 30 ноябр куни ўз ниҳоясига етган ва футболчилар эркин агент мақомига эга бўлишган. (Сайтда чиқарилган маълумотда эса шартнома узайтирилган дейилган);

- 2020 йилда ҳам "Сурхон" футбол клуби ушбу икки легионерга жамоа билан янги шартнома тузишни таклиф қилган. Музокаралар ижобий якун топгач, футболчилар билан январ ойининг сўнги кунларида янги шартнома имзоланган;

- Футболчилар Дарко Станоевич ва Владимир Бубаньялар жорий йилнинг 24 январь куни Тошкент шаҳрига етиб келган ва 26 январдан "Сурхон" футбол клуби машғулотларида иштирок этишни бошлаган;

- "Сурхон" футбол клуби ушбу футболчиларга 3 ойлик иш ҳақини берган. Ойлик иш ҳақи тўланганлиги тўғрисидаги маълумот футболчиларга клуб ҳисобчиси томонидан тақдим этилган;

- Юртимизда жорий йилнинг 16 март санасидан "карантин чоралари" кучайтирилган ва Ўзбекистонда футбол мусобақалари вақтинчалик тўхтатилган;

- 16 мартдан 1 июнга қадар клуб ҳодимлари фаолият юритмаган (жумладан клуб бухгалтерияси ҳам);

- Карантин пайтида (апрел ва май) ойларида ушбу футболчилардан ойлик иш ҳақи қисқартирилиши сўралган лекин ушбу футболчилар рад жавобини беришган. (Ваҳоланки бутун дунёда футболчилар ўзлари ойлик иш ҳақиларини қисқартирилишига рози бўлган, бизда эса унинг акси). Лекин шунга қарамасдан қисман бўлсада ойлик иш ҳақилари бериб борилган. Нима бўлган тақдирда ҳам футболчи ўз ишига профессионаларча ёндашиши керак.

"Сурхон" футбол клуби яқин кунлар ичида ушбу футболчиларнинг ойлик маоши тўлиқ ҳисоб-китоб қилинишини ва ваҳимага ўрин йўқлигини маълум қилади.

Шунингдек, клуб Хомяков борасида ҳам қуйидагиларни қўшимча қилади:

Александр Хомяков ва "Сурхон" футбол клуби узоқ вақт давомида ўзаро музокаралар олиб борди. Лекин якунда икки томон ўзаро молиявий томонлари келиша олмади. ЎзПФЛ томонидан ишлаб чиқилган Регламентга кўра футболчи ёки мураббий Ўзбекистон Профессионал футбол лигасидан тасдиқдан ўтмагунга қадар, шартнома ҳақиқий ҳисобланмайди. Ваҳоланки, мураббий билан ҳеч қанақа шартнома ҳам имзоланмаган ва ушбу мураббий клубда фаолият юритмаган!

"Сурхон" футбол клуби ижтимоий тармоқлар орқали чиқарилаётган турли ҳил маълумотларга ишонмасликларини сўрайди", - деб ёзади "Сурхон" клуби матбуот хизмати.