Суперлига. 4-тур лауреатлари аниқланди

Тур дарвозабони - Ўткир Юсупов ("Навбаҳор")

Ўз вақтида Қаршининг "Насаф" клубида ўйнаган "Навбаҳор" посбони Ўткир Юсупов сайтимиз талқинига кўра 4-турнинг энг яхши дарвозабони деб топилди. "Лочинлар" мавсумдаги илк ғалабани айнан Қаршида қўлга киритишди, бунда Юсуповнинг хиссаси жуда катта бўлди. Ўзининг собиқ клуби билан баҳсда бир неча марта жамоасини голдан қутқариб қолган Ўткир ҳақли равишда тур дарвозабонига айланди.

Тур мураббийи - Андрей Канчельскис ("Навбаҳор")

Дастлабки учта турда умуман ғалаба қозона олмаган Наманганнинг "Навбаҳор" клуби тўртинчи турга келибгина ғалаба қозонди. Қаршида "Насаф"га қарши ўйинда кўпчилик "Навбаҳор"нинг имкониятларини пастроқ баҳолаганди. Сабаби "лочинлар" сўнгги бор Қаршида 1999 йилда "Насаф"дан устун келишганди. Бироқ Канчельскис шогирдлари ўзлари учун мана шу қора анъанага барҳам бера олишди. Шу боис ҳам россиялик мураббий сайтимиз талқинига кўра тур мураббийи деб топилди.

Тур футболчиси - Жасур Жалолиддинов ("Бунёдкор")

Бу мавсум Суперлигада майдонга тушган ва гол урган энг ёш футболчи кетма-кет иккинчи турда рақиб дарвозасига гол урди. Олдинги тур "Навбаҳор" билан баҳсда ўзини кўрсатган футболчи 4-турда "Андижон"га ажойиб гол уришнинг уддасидан чиқди. Вадим Абрамов 16 ёшли футболчига ишонч билдирмоқда, Жасур ўз навбатида бу ишончни оқламоқда. Фақатгина футболчи мана шундай эътирофлардан ҳаволаниб кетмаслиги, юлдузлик касалига чалинмаслиги ва меҳнат қилишдан тўхтаб қолмаслиги лозим.