Сульшер: "Ливерпуль"га қарши ПСЖ билан баҳсга қараганда яхшироқ ўйнашимизни хоҳлайман"

Британиянинг энг катта дербиси якшанба, 24 февраль куни бўлиб ўтади.

"Бу улар учун ҳам, биз учун ҳам муҳим ўйин. Биз топ-4да бўлишни хоҳлаймиз. Биз "Ливерпуль" билан ўйнаймиз ва бу қарама-қаршилик "Манчестер Юнайтед" учун, мухлислар учун, клуб учун қанчалик муҳим эканлигини биламиз. Жамоамиз учун чақирув кутаяпмиз.

Биз МЮ тарихи учун муносиб бўладиган жамоа қурмоқчимиз. Агар уларни уйда мағлуб эта олсак, бу янги қадам бўлиши мумкин. "Тоттенхэм", "Арсенал" ва "Челси"ни сафарда енгиш ажойиб. Лекин, ўзимизни уйда ҳам кўрсатишимиз керак.

Чемпионлик пойгаси "Ливерпуль", "Сити" ва "Тоттенхэм" ўртасида? Мен бошқа жамоалар ва уларнинг иши ҳақида ўйламайман. Мен ўз жамоам ҳақида, курашда бўлиш учун нима қилиш кераклиги ҳақида ўйлайман.

Биринчи ўрин учун кураш 3 жамоа ўртасида кечмоқда, тўртинчи поғона учун ҳам шунча клуб беллашмоқда. Мақсадимиз - олдиндаги ўйин. Мен "Тоттенхэм" чемпион бўлишини хоҳлайманми? Бу ҳақда алоҳида ўйлаб кўрмайман. Балки!

Бизни қийин баҳс кутиб турганини биламиз. Улар бу мавсум ғаройиб ўйнашмоқда. Лекин, улар "Олд Траффорд"да тўп тепиш қийинлигини билишади. Ўйлашимча, улар бизга, биз эса уларга ҳурмат кўрсатамиз.

"Ливерпуль"га қарши ПСЖ билан ўйинга қараганда яхшироқ ўйнашимизни хоҳлайман. Бу бизнинг мақсад. Бу топ рақибга қарши муҳим ўйин. ПСЖ билан ўйин тажрибасидан тўғри хулоса чиқаришимиз ва бутун беллашув давомида ўйинда қолишимиз керак", - дея Сульшернинг сўзларини келтирди МЮ расмий сайти.