“Спартак” - очиқ биринчилик ғолиби

Ўзбекистон Республикаси Президентининг “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармони бу борада дастуриламал вазифасини ўтаётир.
Ўзбекистон “Маҳалла” хайрия жамоат фонди Хоразм вилоят бўлими бошқаруви ҳамда Спорт ўйинлари ва енгил атлетикага ихтисослаштирилган болалар-ўсмирлар спорт мактаби ҳамкорлигида футбол бўйича ўтказилган очиқ биринчилик ҳам ана шу эзгу ишлар самарасидир.

Бинобарин, 2021 йил – “Ёшларни қўллаб-қувватлаш ва аҳоли саломатлигини мустаҳкамлаш йили”га бағишлаб Урганч шаҳридаги “Ёшлик” спорт мажмуаси ва 1-сон футбол маҳорати мактаби стадионида уюштирилган мазкур мусобақада Хоразм ва Бухоро вилоятларининг 2007 - 2008 йилларда туғилган ёш “чарм тўп” ўйини усталаридан ташкил топган 14 та жамоа баҳс юритди.

Учинчи ўрин учун бўлиб ўтган ўйинда Урганч шаҳрининг “Динамо” ва Гурлан туманининг “Гурлан-24” жамоалари ўзаро куч синашди. Бу учрашувда вилоят марказининг ёш футболчилари 2:1 ҳисобида ғалаба қозонишди.
Финал беллашувида “Гурлан” (Гурлан тумани) ва Спорт ўйинлари ва енгил атлетикага ихтисослаштирилган болалар-ўсмирлар спорт мактабининг “Спартак” жамоалари майдонга тушишди. Қизиқарли лаҳзаларга бой кечган ушбу ўйинда спорт мактаби тарбияланувчилари 4:2 ҳисобида зафар қучиб, очиқ биринчилик ғолибига айланишди.

Мусобақанинг ёпилиш маросимида ғолиб ва совриндор жамоаларнинг футболчилари, шунингдек, энг яхши ўйинчилар ташкилотчилар томонидан муносиб тақдирландилар. 

Икром ХУДОЙБЕРГАНОВ, Урганч шаҳридан.