Спаллетти: "Рома" биз учун жуда кўп "тузоқ" тайёрлади, аммо "Наполи" ҳаммасини ажойиб тарзда ҳал қилди"

"Мен Моуриньюнинг ёки бошқа бировнинг фикрларини муҳокама қилишни хоҳламайман. Ўйинни ўзим таҳлил қилмоқчиман. "Рома" биз учун жуда кўп "тузоқ" тайёрлади, бироқ менинг жамоам ҳужумларни ўз жарима майдончасидан бошлашга уриниб хатога йўл қўйган бўлса-да, қийин вазиятлардан чиқиб кетди. 

Биз ғалаба қозонишимизга ёрдам берадиган икки-уч голли вазиятлар яратдик ва "Рома"га ўзлари яхши бўлган бирорта ишини қилишига йўл қўймадик, яъни ҳимояда ва қарши ҳужумда ўйнашига йўл қўймадик. 

Ташқаридан қараганда, "Рома" ҳужумчилар умидида тўпни олдинга тепаётгандек туюлиши мумкин, лекин аслида бу ҳаракатларда маълум бир тактика бор. Бироқ биз ғалаба қозона олдик, ҳаттоки ўзимиз учун бироз ноодатий услубда тўп тепдик. Бунинг учун эса жамоам алоҳида мақтовга лойиқ", – деди Спаллетти.