"Сўғдиёна" - "Турон" учрашувидан сўнг четлатилган ҳакам қайтишини яна "Сўғдиёна" иштирокидаги баҳс билан бошлайди

Бу ўйинда Суперлига дебютанти "Турон" ноҳақ белгиланган пенальти қурбони бўлиб, бунинг оқибатида 0:1 ҳисобида имкониятни бой берган ҳамда ўйиндан сўнг яйпанликлар бош мураббийи Ислом Исмоилов видеода ҳакамлик шаънига аччиқ гапларни гапирганди. 

Орадан кўп ўтмай ўйиндаги ҳакамлик мутахассислар томонидан атрофлича ўрганиб чиқилди ва бош ҳакам Виктор Серазитдинов номуайян муддатга Суперлигадан четлатилди. Лекин Серазетдинов бу орада бекор ўтирмади, у Биринчи лига билан Пролигада фаолият юритди. 

ПФЛ сайтидаги маълумотга кўра, у май ойидан бери Биринчи лиганинг 3та ҳамда Пролиганинг битта учрашувини бошқарган. 

Биринчи лига:

"Нефтгазмонтаж" - "Зомин" 2:1

"Бунёдкор-Фарм" - "Лочин" 0:1

"Чиғатой" - "Зомин" 4:6

Пролига:

"Янгиер" - "Олимпик" 2:0

Бугун ПФЛ сайти Ўзбекистон Кубоги 1/8 финал баҳсларини бошқариб борадиган ҳакамлар рўйхатини эълони қилди. Унга кўра, 20 август куни Жиззах шаҳрида бўлиб ўтадиган "Сўғдиёна" - "Локомотив" учрашувини Виктор Серазитдинов бошқаради.

Бундан кўриниб турибдики, 47 ёшли ҳакам Суперлига жамоалари ўртасидаги ўйинга қайтишини яна "Сўғдиёна" иштирокидаги баҳс билан бошлайди. Серазитдинов бу сафар қандай ҳакамлик қилади, буни вақт кўрсатади.