Сиаваш Ҳақназарий: "Ҳакамлар Мартинни ҳақорат қилгани учун жаҳлим чиқди"

"Биринчи навбатда, ОКМК ва "Насаф" мухлислари ҳамда стадионда бўлган барчадан узр сўрайман. Жамоадошларим билади, мен ҳеч қачон ҳакамга эътироз билдирмайман ва улар билан баҳслашмайман. Бундай қилиш нотўғри. Ҳакамларнинг ёнига борганимда ўйин ҳақида ҳеч нима сўрамадим ва уларга ҳеч нима демадим. Мен Мартин Боакьени ҳакамлар олдидан олиб кетиш учун келган эдим холос. У ҳакамлар билан оддий гаплашиб турганди. Лекин мен ҳакамлар Мартинга нима деганини эшитиб қолдим ва жаҳлим чиқиб кетди. Ҳакамлар Мартинга нисбатан рус тилида ёмон сўзлар ишлатаётган эди. Мен ҳакамларга нега Мартинни ҳақорат қиляпсизлар, дедим ва эътироз билдирдим, сабаби Мартин рус тилини тушунмайди. Мен ҳакамларга эътироз билдирганимдан кейин ҳам ҳакамлар рус тилида бизга нисбатан ёмон сўзлар ишлатишда давом этди. Менимча, улар мени рус тилини билмайди деб ўйлаган, аммо мен рус тилини тушунаман. Мен вазиятни борича айтиб бердим. Бу натижа ёки бугунги учрашув туфайли эмас. 

Ҳа, биз бугун мағлуб бўлдик ва ҳозир яхши кайфиятда эмасмиз. Аммо бу – футбол, унда ҳамма нарса бўлади. Қайсидир жамоа ғалаба қозонади, қайсидири мағлуб бўлади. Футболчилар хато қилади, ҳакамлар ҳам хато қилиши мумкин. Бу футболдаги табиий ҳолат. Лекин ҳозирги кунга келиб бутун дунё ирқчиликка қарши курашмоқда. Айрим бир инсонлар бизга нисбатан бундай муносабатда бўлишларига йўл қўймаслигимиз керак. Ўйинда босим катта бўлади, аммо ҳакамларнинг футболчиларга нисбатан бундай сўзлар ишлатишга ҳаққи йўқ. Мен ушбу сўзларни футбол ичидаги инсонлардан эшитдим. Ўзбекистонда легионерман ва ушбу ҳолат мени жуда хафа қилди", – деди ОКМК футболчиси Сиаваш Ҳақназарий.