Шуҳрат Мақсудов: "Битта ўйиндан иборат учрашувда фаворит бўлмайди"

- Ўйин ҳақида

- Кубок ўйинлари нафақат Ўзбекистонда, бошқа давлатларда ҳам шу каби шиддатли ўтади. Битта ўйиндан иборат учрашувда фаворит бўлмайди. Бугунги ўйин кўрсатиб бердики, ҳар доим рақибни ҳурмат қилмасангиз оқибати ёмон бўлиши мумкин. Биринчи бўлимда йигитлар яхши ўйин намойиш этишди, лекин иккинчи бўлимда ўйинимиз чиқмади. Футбол 90 дақиқадан иборат ва охиригача ўйнаш керак. Ғолиб муҳокама қилинмайди ва йигитларга ўйин учун миннатдорчилик билдираман.

- Ўзбекистон U-23 терма жамоасига "Бунёдкор"дан футболчи чақирилмаганми?

- Ёшлар терма жамоасида "Бунёдкор"дан футболчилар бор. Фақат биз уларни ҳозирда бошқа жамоаларга ижарага берганмиз. "Олимпик" ва "Андижон" сафидан терма жамоага жалб этилган футболчилар орасида бизнинг йигитлар ҳам бор. 

- Ҳужумларни якунлашда муаммолар бордек кўринди...

- Тўғри айтдингиз, ҳужумларга сўнги нуқтани қўйишда камчиликларимиз бор. Мираҳмадов ва Икромовнинг жароҳати борлиги шу чизиқларда муаммолар келтириб чиқаряпти. Бор имкониятдан келиб чиқиб таркиб танлаяпмиз.

- "Бунёдкор" футболчиларига мавсум якунланмасданоқ таклифлар тушаётгани ҳақида эшитдик. Иқтидорли футболчиларни жамоада сақлаб қолишга ҳаракат қилиняптими?

- Биз албатта, буни ҳоҳлаймиз. Бу иш фақат менинг зиммамдаги вазифа эмас, клуб раҳбариятига бу ҳақда мурожаат қилганмиз.

- Чемпионатдаги навбатдаги учрашувлар ҳақида нималарни айта оласиз?

- Хурсанд қиладиган томони чемпионатнинг қолган барча ўйинларини ўз майдонимизда ўтказамиз. "Уйда деворлар ҳам ёрдам беради" дегани каби биз ҳам бир ўйиндан максимал даражада очко олишга ҳаракат қиламиз.