Шохруз Норхонов: “Йўқотилган ҳар бир очко биз учун қимматга тушади”

Ушбу учрашувдан олдин “Обод” клуби футболчиси Шохруз Норхонов ўз фикрларини билдирди.

“Чемпионатимизда қисқа муддатли танаффусдан фойдаланиб бор эътиборимизни ўйин амалиётига қаратдик. Кўпроқ ўртоқлик ўйинлари ўтказишга ҳаракат қилдик. Тактикамиз ўша-ўша, фақат унга бироз ўзгартиришлар киритилди. Эртага “Бунёдкор”га қарши ўйин ўтказамиз, ушбу учрашувга жиддий тайёргарлик кўряпмиз. Бундан буёғига ортимизга йўл йўқ. Йўқотилган ҳар бир очко биз учун қимматга тушади.

Тўғри, “Бунёдкор” чемпионатимиз клублари орасида жуда ҳам кучли жамоа ҳисобланади. “Қалдирғочлар”нинг ўйин услубларини ўрганиб чиқдик, насиб қилса ғалаба қозонишга ҳаракат қиламиз. Биз “Бунёдкор”нинг ўйинига қараб ҳаракат қиламиз. “Бунёдкор”га қарши ҳимоявий ўйин кўрсатамиз. Агар ҳужумкор ўйин кўрсатадиган бўлсак, “Бунёдкор” бизни қарши ҳужумда жазолаб кетиши мумкин. Менимча, эртага қарши ҳужум тактикасида ўйинасак керак”, - дейди “Обод” клуби футболчиси Шохруз Норхонов.

Жаҳонгир Сотволдиев