Шавкат Саидов: "Мавсумдаги энг чиройли ўйинимизни кўрсатдик"

Бугун мавсумдаги энг чиройли ўйинимизни кўрсатдик деб ўйлайман. Мураббийларнинг ўйинга танлаган тактикачи, футболчиларнинг руҳий кайфиятини кўтаришга қилган саъйи ҳаракатлари ўз самарасини берди. Рустам Тўхтамуродович кўп таъкидлайдилар, ҳар қандай танаффус жамоанинг баҳсларга қўшилиб кетишига салбий таъсир кўрсатади деб. Бу айниқса бизнинг олдинги ўйинимизда яққол сезилганди. “Динамо”га қарши учрашувда ҳам ўйин бошида ҳаяжон, масъулият футболчиларимизга салбий таъсир кўрсатди ва ташаббусни меҳмонларга бериб қўйдик. Ушбу дақиқаларда дарвозабонимиз ва марказий ҳимоячиларимиз жамоа жонига оро кирди. Дониёр Одиловнинг дарвозага кириб кетаётган тўпни қайтарганини ёдга олинг.

Биринчи таймда ҳарорат юқори бўлгач, асосий мақсадимиз меҳмонларни чарчатиш эди. Буни ўйинчиларимиз уддалашди. Иккинчи таймда эса икки тезкор ўйинчини майдонга туширишимиз, ўйин тақдирини ҳал этди. Яна шуни таъкидлаш керакки, бугун футболчилар доимо олдинга интилишди. Энг яхши ҳимоя – ҳужум, қабилида тўп сурдик. Натижада мухлисларга ёқадиган ўйин билан, рақибимизни йирик ҳисобда доғда қолдирдик. Олдинда қийин ўйинлар бизни кутиб турибди. Бироқ йигитлар ҳозирги руҳни сақлаб қолишса, ҳар қандай жамоага муносиб қаршилик кўрсатишимизга ишонаман.