Шаҳбоз Жўрабеков: "Кубокни ютиш бугундан "Бухоро"нинг бош мақсадига айланди, финалда кўришгунча"

Гап "Бухоро" ҳақида кетмоқда. Жамоа бу босқичга қадар "Бунёдкор", "Сўғдиёна" каби жамоалар синовидан ўтиб келди. Ярим финал эса ўзгача ҳиссиётларни улашгани шубҳасиз. Хўш, бу борада "Бухоро" ҳимоячиси Шаҳбоз Жўрабеков нималар деди?

- "Сўғдиёна" билан ўйин қайси томонлама қийин ўтди, тарихий натижадан кейинги ҳиссиётлар қандай?

- Тарихий ғалаба ва финал билан барча Бухоро аҳлини, бизга ишонганларни табриклайман. "Сўғдиёна" сафида яхши ижрочилар бор эди. Улар асосан қисқа паслар билан Дориев орқали ўйнашини билар эдик. Ўйинга қаттиқ тайёргарлик кўрдик. Мураббийларимизнинг кўрсатмаларини майдонда бажаришга ҳаракат қилдик. Очиғи тўп назоратида қийналганимизни таъкидлаган бўлардим. Қолган жабҳаларда олдинда бўлдик. Ҳиссиётларнинг чегараси йўқ. Фаолиятимда бундай ҳолатга энди дуч келдим. Умид қиламанки, бу ҳали бошланиши. 

- Александр Хомяков келганига кўп бўлмади, табиийки ўйинни бирданига ўзгартириб юбора олмасди. Асосий ўзгариш нимада кузатилди?

- Биласизми, Хомяков чизмалар чизиб ёки мана бундай ўйнайсизлар дегани йўқ. Таъсирли гаплар билан йигитларни уйғота олди. Керакли гапларни айта олди. Буни тушунган футболчилар якунда борини беришди. Футбол жамоавий ўйин эканлигини яна бир бор исботладик дея оламан. Биз бу босқичга қадар 2 бор мураббий алмаштирдик. Бунда Улуғбек Бакаев ва Виктор Карпенконинг ҳиссаси ҳам катта бўлганини унутмаслигимиз керак. 

- Қўшимча бўлимларда экстра-таймлар ниҳоясига етай деб қолганди. Жамоа пенальтилар сериясига тайёрмиди?

- Ҳа, биз машғулотлардан сўнг пенальтилар сериясига тайёрландик. Лекин ўйин лотореягача етиб боргани йўқ. 

- Финалда сенсация рўй бериши мумкинми?

- 29 октябрь куни яна бир тарих ёзиш учун бугунданоқ ҳаракатни бошлаймиз. Кечаги кун фақат қоғозларда эсдалик бўлиб қолди, холос. Финалгача кимларни ютганимизнинг ўзи бизга таъриф бериб турибди. Тўғри, "Пахтакор" кучли рақиб. Уларни ҳурмат қиламиз. Лекин майдонда жанг қиламиз, чунки финал 1 та ўйиндан иборат. Ортга йўл қолмаганини ҳамма билади. Кубок энди орзу эмас мақсадга айланди. Финалда кўришгунча!