Шаҳбоз Беғамов: "Вазият оммавий муштлашув, жанжалларгача боргани ва бунга Эргашевни гол қувончидаги ҳолатини сабаб қилиб келтириш нотўғри"

«Бунёдкор» — «Насаф» учрашувини телевизорда томоша қилдим. Стадионда эмасдим ва ўйин тугаши билан телевизорни ўчирдим. Ўйиндан кейинги машмашаларни анча вақт ўтиб билдим, видеоларни томоша қилдим.

Ўйин ҳақида айтишим мумкин бўлган нарса шуки, «Насаф» кучли ўйнади. Суҳроб Султонов бўлмаганида катта эҳтимол ишончли ғалаба билан кетарди. Лекин «Насаф» ўйиндаги ушбу устунлигини ҳисобда акс эттира олмади ва натижада дуранг.

Ҳакамлик бўйича ортиқча саволларга ҳожат йўқ менда. Пенальти берилган вазиятда «Насаф» фойда кўрди, зарар эмас. Қизил карточка эса оппоқ қордек топ-тоза. Ҳакам ўйин натижасига таъсир қиладиган қўпол хато қилгани йўқ.

Даврон Эргашевнинг қувончи провакацион чиққани бор гап. Лекин бу унинг қарори, у голни ёки қўлга киритилган 1 очкони шундай нишонлади. Нишонлаш вақтида аниқ бир ҳақоратомуз ҳаракатни кўрмадим. Агарда бирор видеода аниқ бир камситиш ёки ҳақоратомуз ҳаракат бўлган бўлса, унда унга тартиб-интизом қўмитаси тегишли жазоларни беради. Муаммо йўқ. Бу футбол ва унда бу каби эмоциялар нормал, хаттоки керакли ҳолат. Шу учун футболни яхши кўрамиз.

Лекин вазият оммавий муштлашув, жанжалларгача боргани ва бунга Эргашевни гол қувончидаги ҳолатини сабаб келтириш нотўғри. 

Муаммо бошқа тарафда.

«Бунёдкор» тартибли, ҳеч ким билан ортиқча конфликтга бормайдиган ёқимтой жамоа. Унинг айби охирги дақиқаларда ўз уйида яна рақибга гол уриб, хурсандчилик қилганими? Истаганича қувониши мумкин ва буни қоидадан четга чиқмаган ҳолда нишонлашга ҳақли.

Ютсак биз зўр, ютолмасак ҳакамдан айб излаш ёки чидолмай рақибни хурсандчилигини муҳокама қилиш нотўғри.

Ҳамма нарса майдонда қолсин. Бу шунчаки футбол, эмоция берадиган тилло спорт тури. Бошқа чегараларни бузиб ўтишга арзимайди.

• Даврон Эргашевни қилиқлари менга ҳам ёқмади, лекин мен унга голни қандай нишонлашни ўргатишим ёки ўз уйидаги дурангдан қувонишини чеклаб қўйишга ҳаққим йўқ. Характери шунақа экан. Ўтган йили ҳам шундай қилган ва «Насаф» ўшанда майдонда 4та гол билан жавоб берганди. Бу йил «Насаф» майдонда унга жавоб беролмади, балки вақт етмагандир. Лекин майдондан ташқарисида унга бу қилиғи учун жавоб бериш ёки ундан тушунтириш сўраш профессионаллик тарафидан ҳам нотўғри.

Ўйин тугади ва бу мавзу ҳам ёпилгани дуруст. Иккинчи қисмни Қаршидаги майдонда кўрайлик, бўлди.

Бир тарафдан бу нарса ушбу жамоалар ўртасидаги кескинликни ошириб, принципиаллик яратиб қўйди. Катта ўйинлари сони ошди. Лекин бугунги ҳолат катта бир жанжалли вазиятни яратишга арзимайдиган нарса эди. Шунчаки эмоция ва тайёр ғалабани қўлдан чиқаришдан кейинги алам.

Бўптуради.