Сервер Жепаров: “Истиқлол” ғалабаларига ҳисса қўшиб, клуб мухлисларини хурсанд қилмоқчиман

Ўзбекистонлик футболчи “Истиқлол” билан шартнома имзолаганидан мамнун эканини айтиб ўтди.

– “Истиқлол” клуби билан шартнома имзолаганимдан хурсандман. Клуб катта тарихга эга экани ҳамда кўплаб мухлислари борлигини биламан. “Истиқлол” ғалабаларига ҳисса қўшиб, мухлисларни хурсанд қилишга умид қиламан, – деди 35 ёшли ярим ҳимоячи.

Сервер Жепаров “Истиқлол”га тегишли бўлган ҳамда 95 225 мухлисга мўлжалланган “Озоди” стадиони ҳақида ҳам қисқача тўхталиб ўтди.

– “Озоди”стадиони жуда катта ва гўзал. Ўзбекистон термасининг Эронга қарши учрашувларида бу ерга келганман. Стадиондаги муҳит ўзгача, – дейди Жепаров.

Шунингдек, тажрибали ярим ҳимоячи “Истиқлол”нинг Осиё Чемпионлар Лигаси–2017 турниридаги имкониятлари ҳақида сўзлаб берди. Теҳрон клуби гуруҳ босқичига чиқиш учун плей-офф босқичида Қатарнинг “Ал-Садд” клубига қарши баҳс олиб боради.

– “Ал-Садд”га қарши ўйин осон бўлмайди. Аммо Осиё Чемпионлар Лигасининг камида чорак финалига чиқишга умид қиламиз. “Истиқлол” бош мураббийи Алиризо Мансуриан менга ишонч билдирда ва бу ишончни оқлашга ҳаракат қиламан, – дея фикрини якунлади Жепаров.

Маълумот учун, Эрон Про Лигаси вакили – Теҳроннинг “Истиқлол” клуби жорий мавсумда 16-турдан кейин 25 очко билан 16 та жамоа орасида 5-поғонани эгаллаб турибди.