Сергей Тумасян: ”Металлург” бемалол бронза медаллари учун кураша олади"

Бир неча кун олдин жамоани саккиз нафар футболчи тарк этгани ҳақида хабар берган эдик. Афтидан ўтган мавсум ҳаракат қилган россиялик Сергей Тумасян ҳам бекободликлар билан хайрлашган кўринади. Буни клуб матбуот ҳизмати ҳам тасдиқлади. Барчасига ойдинлик киритиш мақсадида футболчи билан боғландик.

- “Металлург” янги мавсумга ҳозирлик кўрмоқда. Таркибда ҳам ўзгаришлар етарлича. Бироқ, дастлабки йиғинда сиз кўриниш бермадингиз...
- Ҳа. Ҳозирда жамоа билан бирга эмасман. Бу ҳақиқат. Мавсум ниҳоясига етгач юртимга жўнаб кетдим. Ростовда истиқомат қилмоқдаман. Оилам даврасида ҳордиқ чиқаряпман. Футболчи вақтида дам олишни билиши лозим. Жамоани илиқ хотиралар билан тарк этдим.

- Ўтган йилги фаолиятингизда илк бор Ўзбекистон чемпионатида тўп тепдингиз. Таассуротлар қандай бўлди?
- Мавсумни яхши якунлаб олдик. Кучли бешликдан жой олдик. Лекин, доим бундан кўпроғига интилишимиз керак. Агарда жамоа ўтган мавсумда тўп тепган футболчиларини, умумий қилиб айтганда ўзагини сақлаб қолса бемалол бронза медаллари учун кураша олади. Ички чемпионат баҳслари менга манзур келди. Бу ерда ишқибозлар футболни севишади. Мен “Металлург” жамоаси мухлисларига ва ходимларига алоҳида миннатдорчилик билдираман.

- Клубдаги шароитлар сизни қониқтирдими?
- Машғулот ўтказиш ва ўйинга тайёргарлик кўриш учун яхши шароитлар яратиб берилди.

Абдулазиз Искандаров суҳбатлашди