Саудия чемпионатида жамоалар сони оширилади

Маълумки, ҳозир ушбу давлат Про лигасида 14та жамоа кураш олиб бормоқда. Мутахассисларнинг айтишича, бу камлик қиляпти. Натижада жамоаларни 16тага етказиш фикри маъқулланди. Саудия Арабистони футбол федерацияси биринчи лига клубларига қўйилган легионерлар лимитини ҳам кўриб чиқди ва жамоаларнинг етти нафар хорижлик билан шартнома имзолашига рухсат берди. Бунгача фақат иккита чет эллик билан шартнома тузиш мумкин эди.

Ушбу мавсум якунига етганидан сўнг биринчи лиганинг иккита клуби Про лига йўлланмасини қўлга киритади. Про лигада 13-14 ўринни эгаллаган клублар биринчи лиганинг 3-4 жамоаси билан ўтиш ўйинида ўйнайди. Кейинги йилдан эса Про лигани охирги учта ўриндаги жамоа тарк этади ва биринчи лигадан учта жамоа элитага йўл олади. Про лиганинг 13-жамоаси эса биринчи лиганинг тўртинчи жамоаси билан иккита ўйиндан иборат плей-офф баҳсида ўйнайди.

Кейинги йилдан Саудия биринчи лигасида жамоалар сони 16тадан 20тага оширилади. Ғолиб жамоа федерация томонидан 1,3 миллион доллар миқдоридаги мукофот пулига эга бўлади. Иккинчи лига иштирокчилари сони эса 20тадан 24тага етказилади. Бундан ташқари, U-21 чемпионати бекор қилинади ва унинг ўрнига бошқа лига ташкил этиш устида иш олиб борилмоқда.