Сарвар Шоаҳмедов: “Дастлабки ўйин бўлгани боис камчиликлар кузатилди”

Учрашувдан сўнг “темирйўлчилар” етакчи футзалчиси Сарвар Шоаҳмедов билан суҳбатлашдик.

"Ўйиндан олдин йигитлар билан келишиб олгандик. “Бунёдкор”га қарши ўйнаш қийин бўлишини билардик. Улардаги болалар бир неча йиллардан буён биргаликда тўп тепаётгани боис аҳиллигини билардик. 

Биз ўйин давомида бир-биримизни қўллаб-қуввтлаган ҳолда ҳаракат қилдик ва муҳим ғалабани қўлга киритдик. Мавсумдаги биринчи ўйини бўлгани боис камчиликлар кузатилди. Кейинги баҳсларда ўйин услубимиз бир маромга келади.

Мақсадимиз чемпионликни қўлга киритиш ҳисобланади. Бу йил таркибимизда яна ўзгаришлар бўлди. Шунга қарамай, бир-биримизни анчадан бери биламиз. Чемпионатда рақобатчи жамоалар кўп. Имкон қадар очко йўқотмаслигимиз лозим. “Локомотив” чемпион бўлиб, келгуси йилда халқаро майдонда тўп тепишни режалаштирган. 

Кейинги рақибимиз ҳақида илиқ фикрларни айтишим мумкин. Чунки “Xuaxin-Жиззах” клуби мавсум олдидан таркибни жаҳон чемпионатида иштирок этиб келган тажрибали футболчилар билан кучайтирди. Қизиқарли ва муросасиз ўйин бўлиши табиий. 

Шу ўринда жамоамиз раҳбариятига каттакон раҳмат айтишимиз керак. Тўлабек Акрамов, Қобил Юнусов, Равшан Муқимовга миннатдорчилик билдирамиз. Чунки бу инсонлар клубга эътибор бермоқда. Биз эса бундан хурсандмиз ва ғалабаларимиз билан хушнуд этмоқчимиз", – деди Сарвар Шоаҳмедов.