Сардор Мирзаев: “Бу мавсум чемпионлик учун кураша олмаймиз. Чунки...”

 Футболчи билан суҳбатлашиш жараёнида айрим саволларимизга жавоб олдик. 

- Сардор, “Муангтонг Юнайтед” янги мавсумда ўз олдига қандай мақсадларни қўйган?

- Бу йилги мақсадларимиз катта эмас. Чунки пандемия туфайли клубимизда молиявий муаммолар юзага келди, юқори савиядаги ижрочиларни таклиф қилишда қийинчиликлар юзага келди. Гарчи таркибимизда юқори даражадаги ўйинчилар бўлмаса-да, иқтидорли ёшлар билан кучли бешлик учун кураша оламиз. 

- Ўтган мавсумда 14та гол урдингиз. Бу мавсумда нечта гол уришни режалаштирмоқдасиз?

- Имкон қадар ўтган мавсумга қараганда, кўпроқ гол урмоқчиман. Бироқ менинг асосий мақсадим, жамоадошларимнинг голларига кўпроқ ассист вазифасини бажаришни истайман. 

- “Муангтонг Юнайтед” билан шартномангиз қачон тугайди? 

- Таиланд клуби билан шартномам шу йилнинг декабрида поёнига етади. Ҳозирда келгусида қайси жамоада тўп суришим бўйича ўйлаганим йўқ. Чунки чемпионат ўйинларга катта эътибор қаратганман. Лекин “Муангтонг Юнайтед” шартномани узайтириш истагида. Аввало шартномам якунланиб бораверсин, қолганини вақт кўрсатади. 

- Таиланд мамлакатига мослашиб кетишда муаммолар юзага келмадими?

- Бошида қийинчиликлар бўлди. Иссиқ ҳавоси, овқатларига кўникишда бироз мослашиш қийин бўлди. Ҳозирга келиб ҳаммаси жойига тушди.