Санжар Тўрақулов: “Мухлисларимиз борлиги – омадимиз”

-   Ўйин қизиқарли бўлди. Иккала жамоа ҳам ҳужумкор ва мухлисларга манзур бўладиган ўйин намойиш этишди. Афсуски бутун ўйин давомида ёғиб турган ёмғир ўйин сифатига таъсир қилди. “Насаф” кучли жамоа, ОЧЛда ҳам муносиб иштирок этмоқда. Шундай рақиб билан тенгма-тенг курашганимиз – жамоамизнинг ютуғи. Гарчи бугун ютқазган бўлсакда, бу ўйин ўз кучимизга бўлган ишончни ошишига ёрдам беради, деб ўйлайман.

-   Сиз асли Қашқадарё фарзандисиз. Туғилиб ўсган воҳа жамоасига қарши тўп тепиш осон бўлмаса керак...
-   Биз профессионалмиз. Майдонга тушдикми, вазифамизни сидқидилдан бажаришимиз керак.

-   Бир вазиятда сизнинг зарбангизга бироз аниқлик етишмади. Бунда майдон ҳолати ҳам ўз таъсирини кўрсатдими?
-   Албатта. Чунки ёмғир натижасида тўп сирпанчиқ ҳамда вазни ҳам бироз оғирлашган эди. Дониёр (Ҳасанов) бурчакдан тўпни ўйинга киритгач, уни ҳимоячилар қайтарди ва тўп оёғимга келиб тушди. Ўша вазиятда назаримда тўп ҳимоячининг қўлига теккандек кўринди. Бу пенальти дегани. Лекин ҳакам тўп яна бурчакдан ўйинга киритилишини кўрсатди.

-   Жамоани қўллаб-қувватлаш учун пойтахтдам кам сонли бўлса-да мухлислар ташриф буюришди.
-   Сафардаги ўйинларда мухлисларнинг келиб қўллаб туриши футболчиларга қўшимча куч бағишлайди. Шундай мухлисларимизнинг борлиги – бу бизнинг омадимиз. Келгуси ўйинларда уларни ғалабаларимиз билан қувонтиришга ҳаракат қиламиз.