Салоҳ ва бир неча сабаблар ёхуд ФИФА футболчиларни ижарага беришни тақиқламаслиги керак

Ўтган ёзда ПСЖ молиявий фэйр-плейнинг устидан кулди ва Килиан Мбаппени "Монако"дан 180 млн еврога сотиб олиш шарти билан ижарага олди. "France Football" нашри хабарига кўра, ФИФА футболчиларни ижарага беришни тақиқламоқчи. Аммо бундай қилиш керак эмас. Бу кўп ҳолатларда футболчиларнинг фойдасига ишлайди.

ФЕРНАНДО МОРЬЕНТЕС

Ижарага берилган мавсум: 2003/04
Жамоа: "Реал"дан "Монако"га

Испаниялик футболчи "Реал" билан уч бора Европа чемпионлар лигаси ғолиби бўлди. Икки марта миллий чемпионатда бош совринни қўлга киритди. Бироқ у ўз жамоасида ривожлана олмади. Роналдонинг трансферидан кейин Фернандонинг ўйин амалиёти пасайиб кетди. Шу боисдан жамоа раҳбарияти 27 ёшли футболчини "Монако"га ижарага берди.

Мадрид жамоасидагилар кейинчалик бунга афсусланган бўлсалар керак. Орадан 7 ой вақт ўтиб, ЕЧЛ чорак финалида у Икер Касильяс дарвозасини икки бора ишғол этди ва ўз жамоасини турнирдан чиқариб юборди. "Монако" финалгача етиб борди ва баҳсда "Порту"га (0:3) мағлуб бўлди. Испаниялик футболчи эса "Олтин бутса"ни қабул қилиб олди. Бунга у ўз меҳнатлари билан эришганди.

ТИБО КУРТУА

Ижарага берилган мавсум: 2011/12, 2012/13, 2013/14
Жамоа: "Челси"дан "Атлетико"га

"Челси" ҳар доим ўз тарбияланувчиларига катта аҳамият бериб келади. Ёшларни шакллантиради ва Европанинг бошқа жамоаларига ижарага беради. Улар ўша клубларда катта тажриба тўплашади. Бир вақтлар дарвозабон Матей Делач 7 ой ўзига бериладиган имкониятни кутганди.

Бироқ ундан-да яхшироқ дарвозабон ҳам бор. Тибо Куртуа "Атлетико" сафида ўйнади ва "Челси"га қайтганидан кейин Петр Чехнинг жойини эгаллади. Тибо уч йилда Испанияда тўртта соврин қўлга киритди. Европа лигаси ғолиби бўлди ва ЕЧЛда кумуш медалларга эга чиқди. Беш мавсум давомида у "Челси"да 3 совринга эга чиққанди.

2013/14 йилги мавсум ЕЧЛда Тибо "Атлетико" билан биргаликда турнирнинг финалигача борди. Қизиғи, у ҳам ярим финалда ўз жамоаси "Челси"нинг тор-мор этилишида катта ҳисса қўшди.

КЕВИН ДЕ БРЮЙНЕ

Ижарага берилган мавсум: 2012/13
Жамоа: "Челси"дан "Вердер"га

Бременда у ўзининг энг яхши даврини бошлади. Кевин унчалик кучли бўлмаган "Вердер"нинг асосий футболчисига айланди ва Бундеслиганинг энг яхши ассистентларидан бири бўлди. Бироқ Жозе Моуриньо уни "Челси"га керак эмас деб ҳисоблади. 2013/14 йилги мавсумнинг дастлабки қисмида у "Челси" таркибида 3 ўйинда қатнашди. 2014 йилнинг қишида уни Дортмунднинг "Боруссия"си ва "Байер"га ижарага беришга таклиф қилишди. Бироқ бунга рад жавоби берилганидан кейин Кевин "Вольфсбург"га 21,5 млн еврога трансфер қилинди.

Айни дамда у "Манчестер Сити"нинг асосий футболчиси. Кевин жамоасининг Англия чемпиони бўлишида катта ҳисса қўшди.

РОМЕЛУ ЛУКАКУ

Ижарага берилган мавсум: 2012/13, 2013/14
Жамоа: "Челси"дан "Вест Бромвич" ва "Эвертон"га

2012 йилнинг баҳорида "Челси" ЕЧЛ ғолиблигини қўлга киритди. Лукаку бу турнирнинг бирорта баҳсида майдонга тушмади. Автобусда Соломон Калу ЕЧЛ совринини 19 ёшли футболчининг тиззасига қўйганида у шундай деган экан: "Олиб ташланг, бу совриннинг менга ҳеч қандай аҳамияти йўқ".

Кейинги мавсумда у "Вест Бромвич"га ижарага берилди. Натижалар яхши: АПЛда 17 гол, шунингдек, Алекс Фергюсоннинг хайрлашув учрашувида хет-трик. Вақт ўтиб у яна "Челси"га қайтди, бироқ яна голлар кирита олмади. Оқибатда "Эвертон"га ижарага берилди. У ерда Ромелу яхши тўпурарлигини исботлади.

МУҲАММАД САЛОҲ

Ижарага берилган мавсум: 2014/15 (иккинчи қисмда), 2015/16
Жамоа: "Челси"дан "Фиорентина" ва "Рома"га

Бугунги Муҳаммад Салоҳ - Италия футболининг кашфиёти. Жозе Моуриньо шундай ҳисоблайди, чунки у "Челси"да очилиб кетмаган: "У Италияда ривожланди, жисмоний жиҳатдан анча кучли бўлди", - деганди Жозе.

Апеннинда Салоҳ бошқатдан туғилди. У ерда захирада ўтирмади. "Фиорентина"да у 26 учрашувда қатнашди ва 9 гол киритди. "Рома"да эса ундан-да кучлироқ ўйнади: йилнинг энг яхши футболчиси ва тўпурари. Римликлар футболчини "Ливерпул"га яхшигина тайёрлаб бера олишди.

ХАМЕС РОДРИГЕС

Ижарага берилган мавсум: 2017/18
Жамоа: "Реал"дан "Бавария"га

Колумбиялик плеймейкернинг иқтидори юқори. У захирада ўтиришга лойиқ эмас. ЖЧ-2014да яхши ўйин намойиш этган футболчи Зидан билан келиша олмади, энди Хайнкес билан бахтиёр бўлиб ишламоқда. Айни дамда у Бундеслигада ассистентлар бўйича 3-ўринда бўлиб турибди.

"Мадридда у қандай даражадалигини кўрсатиш учун етарлича имконият бўлмади. Бироқ Мюнхенда у бахтиёр яшамоқда. Бу ерда янги бўлса ҳам, Германиянинг маданияти, тили ва яшаш тарзига кўникиб кетди", - деди Хайнкес.

Энди у ҳам ЕЧЛ ярим финалида ўз жамоаси - "Реал"га қарши учрашувда майдонга тушиши кутилмоқда.

МИШИ БАТШУАЙИ

Ижарага берилган мавсум: 2017/18 (иккинчи қисм)
Жамоа: "Челси"дан "Боруссия" Дортмундга

"Боруссия"да ҳар доим гол урадиган футболчилар бўлган: Лукас Барриос,  Роберт Левандовски ва Пьер-Эмерик Обамеянг фанатларга кўплаб голлар уришини исботлаб бўлганди. Миши ҳам одатни бузмаяпти: 13 учрашувда 9 гол.

Миши бир неча ойдаёқ "Челси"га керакли футболчи эканлигини исботлади. Жамоага Мората керак эмас, Батшуайига вақт беринг у исботлайди.

"Дортмундга ўзимни топиш учун келдим. Бир ярим йил давомида захирада ўтирдим. Ҳатто футзал ҳам ўйнадим. Энди эса ҳақиқий Мишини кўряпман, бу жуда яхши!". "Боруссия" футболчини 60 млн еврога сотиб олиши мумкин.

Миржалол Норматов таржимаси