Салимжон Зокиров: “Жамоамизга янги келиб қўшилган футболчилар ҳали тўлиқ мослашиб кетишмади”

Бугунги учрашув ноқулай об-ҳаво шароитида ўтди. Гарчи учрашувни 17:00да бошлаган бўлсакда, барбир айнан бугунги об-ҳаво жуда иссиқ эди, бу ўз навбатида ҳар икки жамоага бир оз ноқулайлик туғдирди. Аввало шуни айтиш жоизки, бугун рақибларимиз ҳам фаол ўйин намойиш этишди.

Биз айни дамда турнир жадвалига иккинчи ўриндамиз, ўз ўрнимизни мустаҳкамлаб олиш, пешқадамга етиб олиш учун бизга фақат ва фақат ғалаба зарур эди. Шу боис биз бугун ҳужумкор футбол тактикасини танлагандик. Биринчи бўлимда бизда қийинчиликлар юзага келди. Гол уриб олгунимизгача, тўғриси жуда оғир ўйин ўтказдик. Биринчи гол бизга руҳий томондан устунлик берди. Иккинчи бўлимда ҳам жамоамиз аъзолари майдонда мардонавор кураш олиб боришди ва якунда йирик ҳисобда ғалаба қозондик.

Жамоамизга янги келиб қўшилган футболчилар ҳали тўлиқ бизнинг ўйин услубимизга мослашиб кетиша олгани йўқ.  Дарвозабон Аброрбек Каримовнинг иқтидорига шубҳа йўқ, лекин айни дамда Жасур Абдуллаев яхши ҳаракат қилмоқда. Албатта кейинги учрашувларда Аброрбек Каримовни ҳам синовдан ўтказиш режамизда бор. Ҳошимбек Шокировга бир оз жисмоний тайёргарлик етишмаяпти чамамда. Бугун у майдонда ажойиб ҳаракат қилди, тажрибаси эвазига кўплаб вазиятларда рақиблардан устунлик қилди, лекин биз биламиз у бундан ҳам кўпроғига қодир. Шунгидек бугун биз ёш иқтидорли ҳужумчи Сардорбек Солиевни ҳам учрашув сўнгида майдонга туширдик, бу ўз навбатида ёш иқтидор соҳибига маҳорат мактаби бўлади деб ҳисоблайман.

Умуман олганда, шогирдларимдан кўнглдим тўқ, биз Про-Лигада юқори ўринлар учун курашаяпмиз, жамоамиз олдига айнан шундай вазифа қўйилган, биз бу вазифани уддалашга ҳаракат қиламиз.  
 
Бекзод Толибов ёзиб олди.