Рустам Абдуллаев: "Олий лигада қолиш асосий вазифамиз"

"Жамоа мавсумга тайёргарлик жараёнини яхши ўтказди. Янги мавсумда "Қўқон-1912"нинг асосий вазифаси бу Олий лигада қолиш. Бу бизнинг минимум вазифамиз. Имкон қадар турнир жадвалининг юқорироқ ўринлари учун кураш олиб борамиз. Кучли "ўнталикка" киришга ҳаракат қиламиз. Клуб раҳбарияти имкон қадар барча шароитларни яратиб беришга ҳаракат қилмоқда. Шароитларимиз жуда юқори даражада эмасдир, лекин ёмон ҳам эмас. Қисқа қилиб айтганда, "кўрпачага қараб оёғ узатамиз". Таркибдаги ёши катта футболчилар? Футболда футболчининг 35 ёши ҳеч нимани англатмайди. Ҳаммаси руҳият ва жисмоний ҳолатига боғлиқ. Айни дамда жамоамизга тажрибали футболчилар зарур. Жамоамиздаги ёш футболчилар майдонда қалтираб қолмасликлари учун ҳам Алексей Николаев сингари тажрибали футболчиларни жалб этдик. Николаев ўз фаолияти давомида катта ўйинларда кўп ўйнаган ва бой тажрибага эга. Унинг катта тажрибаси жамоамизга қўл келади деб ўйлайман. Жамоа ўз ўйинини топиб олиш учун бироз вақт талаб этилади. Айни пайтда ўйинимизни шакллантириш борасида ишлар олиб борилмоқда. Дастлабки тур ўйинлари биз учун осон бўлмаслиги аниқ. Янги мавсумда "Қўқон-1912" жамоасидан Дониёр Усмонов, Аваз Маматхўжаев каби ёш иқтидорли футболчилар ўзларини кўрсата олишади деб ўйлайман. Умид қиламанки, ўз ўйинларимиз билан футбол мухлисларини хурсанд этамиз ва шунга ҳаракат қиламиз", - дейди Рустам Абдуллаев.