Руфат Акрамхўжаев: "Биринчи бўлимда футболчиларни таниб бўлмади"

"Локомотив" жамоасини ғалаба билан табриклайман. Ўйин ҳақида айтадиган бўлсам, биринчи бўлимда жамоамиз футболчиларини умуман таниб бўлмади. Хато эвазига гол ўтказиб юбордик. Иккинчи бўлимда вазиятни ўнглашга ҳаракат қилдик. Ўрта чизиқда ўйинимиз қовушмагани, керакмас вазиятлардаги хатолар, муҳим паллаларда тўпни йўқотилгани мағлубиятга сабаб бўлди.

Бир-икки вазиятда рақиб дарвозасини ишғол қилиш учун имкониятимиз бўлди, афсуски фойдалана олмадик. Бугун стадионга келиб бизни қўллаб-қувватлаб турган мухлисларга хурсандчилик улаша олмадик. 

Шуни айтмоқчиман, ҳар бир футболчи майдонга тушганидан сўнг масъулиятни ҳис қилиши керак. Вазиятларни сезиши керак, бор кучи билан ўйнаши керак. Бир-икки чизиқда оқсоқланиш кузатилса вазиятни ўнглаш қийин бўлади. Заҳира ўриндиғимиз тор, шу сабаб баъзи футболчиларни алмаштиришга қийналдик. Албатта вазиятни ўнглашга, навбатдаги ўйинларда ғалаба қозонишга ҳаракат қиламиз",- дейди Руфат Акрамхўжаев.