Рўзиқул Бердиев: “ Шораҳмедов билан хайрлашиш ниятимиз йўқ”

Илгарироқ сайтимиз орқали “Насаф” дарвозабони Элдор Суюнов ва Шерзод Аъзамовга Тошкентнинг “Пахткор” клубидан қизиқиш бўлаётганлиги ҳақида хабар бергандик.  Рўзиқул Саъдуллаевич Тошкент жамоасидан бўлаётган таклифини инкор этмади.

“Суюнов ва Аъзамовга “Пахтакор”дан жиддий таклиф бор. Бу таклиф улар учун янги чақирув. Аммо уларнинг клубимиз билан амалдаги шартномалари бор. Уларнинг “Пахтакор”га ўтиш ёки ўтмаслиги борасида якуний қарорни клуб раҳбарияти қабул қилади. Мабодо улар жамоани тарк этадиган бўлса, уларнинг ўрнини тўлдиришимиз керак бўлади”, дейди Бердиев.

Шунингдек, Рўзиқул Бердиев давралар оралиғида фаол селекция ишлари олиб борилиши ва жамоага легионер таклиф этиш ниятида эканлигини маълум қилди.

“Бу борада режаларимиз ҳам бор. Ҳужум чизиғи ва қанотни кучайтириш мақсадида ишлар олиб бораяпмиз. Номзодлар ҳам бор, аммо буни ҳозир очиқламоқчи эмасман. Имкон бўлса,  хорижлик футболчиларни сафимизга қўшиб олмоқчимиз” дея сўзида давом этди Ўзбекистоннинг 2016 йилдаги энг яхши мураббийи.

Анжуман якунида “Насаф” бош мураббийи мавсум аввалида “Бунёдкор”дан “Насаф”га кўчиб ўтган Акмал Шораҳмедовнинг яна Тошкент жамоасига қайтиши мумкинлиги ҳақидаги гап сўзларга изоҳ берди.

“Акмал Шораҳмедов борасида гапирадиган бўлсам, бу ўйинчи жамоамиз учун жуда керакли. Уни ҳам клубимиз билан амалдаги шартномаси бор. Биз уни ҳеч қаерга қўйиб юбориш ниятимиз йўқ”, дея таъкидлаб ўтди “Насаф” бош мураббийи.