Роналду паделга 5 миллион евро сармоя киритди

Португалия терма жамоаси ҳужумчиси Лиссабондаги спорт марказининг 100% акцияларини харид қилди ҳамда сотиб олиш ва таъмирлаш учун тахминан 5 миллион евро (тахминан 5,4 миллион доллар) сармоя киритди. 100 000 га яқин аҳолиси бўлган Лиссабон четида жойлашган Оэйраш шаҳрида жойлашган иншоот биринчи навбатда тез ривожланаётган спорт тури бўлган падел учун мўлжалланган.

Португалия падел федерацияси (FPP) президенти Рикарду Оливейранинг сўзларига кўра, Роналдунинг келиши спортни бутунлай ўзгартириб юборади: 

"Криштианунинг иштироки паделни нафақат Португалияда, балки бутун дунё бўйлаб ўзгартиради. У ҳар куни футбол майдонида машғулот ўтказади, лекин менга айтишларича, у деярли ҳар куни падел ўйнайди. У ҳақиқатан ушбу спорт турини жуда яхши кўради".

Роналду аввалроқ ўзининг ижтимоий тармоқларида падел клипларини баҳам кўрган ва ўзининг барча платформалардаги мухлисларини бу спорт билан таништирган.